Pentagon Phantom jaýynger robottaryna tapsyrys berdi
ASTANA. KAZINFORM - Foundation Future Industries AQSh Qorǵanys mınıstrligimen 24 mıllıon dollar kóleminde kelisimshart jasasyp, Phantom dep atalatyn asa qýatty gýmanoıd robottardy óndirýge kiristi, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.
AQSh prezıdentiniń uly Erık Tramp qoldaý kórsetip otyrǵan bul startap Qytaımen tehnologııalyq básekede basymdyqqa umtylyp otyr.
Jaýynger robottar jaý nysandaryna enip, amerıkalyq áskerdi qorǵaıtyn bolady. Kompanııanyń bas dırektory Sanket Pathak pen strategııalyq keńesshi Erık Tramp bul tehnologııa AQSh-tyń urys alańyndaǵy artyqshylyǵyn saqtaýǵa múmkindik beretinin atap ótti.
Sanket Pathaktyń aıtýynsha, Qytaı da uqsas baǵytta jumys júrgizip, jerústi jáne áýe avtonomdy júıelerin damytýda eleýli nátıjelerge qol jetkizip otyr.
Óz kezeginde Erık Tramp Phantom jobasyna ınvestıtsııa salý sheshimin Qytaıdan ozyp shyǵý qajettiligimen baılanystyrdy.
Onyń aıtýynsha, robottardyń múmkindikteri áskerı operatsııalardyń sıpatyn ózgertýi yqtımal.
Phantom robotynyń salmaǵy 79 kelini quraıdy, qozǵalý jyldamdyǵy sekýndyna 1,7 metrge deıin jetedi. Qazirgi ýaqytta Phantom-2 úlgisi de ázirlený ústinde. Robottar tek qorǵanys salasynda ǵana emes, qurylys jáne tabıǵı apattardyń saldaryn joıý baǵyttarynda da qoldanylýy múmkin.
Buǵan deıin Beıjińde ótken jartylaı marafonda robot álemdik rekord ornatqany habarlanǵan bolatyn.
