Pedagogter qyzmetiniń tıimdilik reıtıngi engiziledi

ASTANA. KAZINFORM – «Ustaz» ulttyq platformasynda pedagog qyzmetkerlerdiń biryńǵaı derekter bazasy jasaqtalady. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

- Mınıstrlik «Ustaz» pedagogterdi úzdiksiz kásiptik damytý ulttyq platformasyn engizdi. Onyń qyzmeti pedagogterdi attestatsııadan ótkizý erejesimen jáne sharttarymen retteledi. Bıyl platformada «pedagog-moderator» jáne «pedagog-sarapshy» biliktilik sanattaryna pedagogterdi attestattaý ótedi. Sonymen qatar 2026 jyldyń sońyna qaraı platformada tolyqtaı kásiptik trekıngti qamtamasyz etetin pedagog qyzmetkerlerdiń biryńǵaı derekter bazasy jasaqtalady. Munan bólek, pedagogter men bilim berý uıymdary basshylary qyzmetiniń tıimdilik reıtıngin engizý jumysy júrgizilip jatyr, - dep atap ótedi Úkimet basshysy jaýabynda.

Onyń atap ótýinshe, platformany damytý aıasynda pedagog kadrlarǵa óńirlerdiń qajettiligin saraptaý jáne boljaý algorıtmine jasandy ıntellekt engizý josparlanǵan.

- Aıqyn ólshemsharttar negizinde platformada úzdik pedagogter tizilimi jasaqtalady. Bul olardyń tájirıbesin taratýdy qamtamasyz etýge múmkindik beredi. Osylaısha, platforma pedagogterdiń sandyq sapalyq quramyna tsıfrlyq monıtorıng engizýge, pedagogterge biliktilik sanattaryn berýge baqylaýdy kúsheıtýge, pedagogterdiń anyq mansaptyq ósýin qamtamasyz etýge múmkindik beredi, - dedi Oljas Bektenov.

Buǵan deıin elimizdiń orta bilim berý uıymdarynda pedagog-kásiptik baǵdar berýshi laýazymy resmı túrde bekitilgenin jazǵan edik.