Pavlodardaǵy Korıakovka kóli tartylyp barady

ASTANA. QazAqparat – Ekologııa mınıstrliginiń ókilderi Pavlodar aýdanynda ornalasqan Korıakovka kóline bardy. Mınıstrlik qyzmetkerleri, ákimdik ókilderi, ekologtar, jergilikti turǵyndar sý aıdynyn aralaý kezinde tuz óndirilgenin atap ótti, dep habarlady QazAqparat.

Biraq óndiris ónerkásiptik kólemde emes. Ekologııa jáne tabıǵı resýrstar mınıstrliginiń málimetinshe, negizinen, halyq óz qajettilikterin qanaǵattandyrý úshin tuz jınaǵan. Bul qarapaıym ádispen (vannalarda) júrgiziledi.

Korıakovka kóli jazyq oıpatta ornalasqan. Kóldiń aýdany shamamen 11 km2, uzyndyǵy – 5,6 km, eni – 1,5 km. Sý aıdynynyń aýdany – 4,1 km2, tereńdigi 0,3-0,7 m. Kól uzdy shógindiden quralǵan. Tuz qabatynyń tyǵyzdyǵy ózgermeli, 0,42-den 0,76 m aralyǵynda, ortasha 0,61 m.

Kól Pavlodar qalasynan soltústik-shyǵysqa qaraı 17 km jerde ornalasqan. Kólge eń jaqyn ornalaskan eldi mekender: Korıakovka (batysqa qaraı) jáne Kemenger (soltústik-shyǵysqa qaraı) aýyldary. Aýdan jer bederi jazyq qurǵaq dala aımaǵynda ornalasqan.

Korıakovka aǵynsyz kólge jatady. Sondyqtan negizinen kúzgi jáne qysqy jaýyn-shashyn mólsheri esebinen tolyp otyrady. Ol Pavlodar oblysynyń balyq sharýashylyǵy sý aıdyndarynyń tizimine kirmeıdi.

«Eger kóldiń taıazdanýy týraly aıtatyn bolsaq, Korıakovka kóliniń tartylýy tabıǵı-klımattyq jaǵdaılarǵa baılanysty. Bıyl sý sharýashylyǵy úshin qolaısyz klımattyq jaǵdaı týyndaǵanyn atap ótý kerek. Qysta qar az tústi jáne jyl basynan beri aǵyn sýdyń bolmaýyna baılanysty, kóldiń sý deńgeıi tómendep ketti. Al ózender men salalar túrinde kólge quıatyn tabıǵı qorektený kózi joq. Sonymen qatar bıyl óńirde sý az, qurǵaqshylyq pen aýa raıynyń joǵary temperatýrasy baıqalady», - dep atap ótti Ekologııalyq retteý jáne baqylaý komıteti tóraǵasynyń orynbasary E.Omarov.

Sondaı-aq jergilikti turǵyndar sońǵy tórt jylda aýa raıyna baılanysty kól shynymen de tartylyp ketkenin, biraq bul tsıkldik, klımattyq jaǵdaılarmen baılanysty ekenin atap ótti.

Sapar qorytyndysy boıynsha kól aýmaǵyn kólik shınalarynan tazartý, ýchaskelik ınspektorlarǵa kóldiń aýmaǵyna avtokólikpen kirýdi baqylaýdy kúsheıtý boıynsha tapsyrmalar berildi.

Aıta keteıik, buǵan deıin áleýmettik jelide adamdardyń Korıakovka kólin qurǵatyp, túbindegi tuzdy qapqa salyp áketip jatqany jazylǵan bolatyn.

Osyǵan oraı Ekologııa jáne tabıǵı resýrstar mınıstri Zúlfııa Súleımenova Korıakovka kóliniń jaı-kúıi týraly pikir bildirip, Pavlodar oblystyq tabıǵı resýrstar jáne tabıǵat paıdalanýdy retteý basqarmasy, ekologtar jáne qoǵam belsendileriniń qatysýymen komıssııa qurylyp jatqanyn jetkizdi.

Korıakovka – Qazaqstandaǵy ekinshi qyzǵylt tústi sırek kól.