Pavlodardaǵy jyly aıaldamalar aıazdy kúnderi ańyrap tur

PAVLODAR. KAZINFORM — Pavlodar qalasynda jabyq tıptegi 12 jyly aıaldama bar. Alaıda saqyldaǵan sary aıazda qoǵamdyq kólik kútken turǵyndar mundaı aıaldamanyń ishinen dala jyly deıdi.

Oblys ortalyǵynda jabdyqtalǵan jyly aıaldamalar qystyń aıazynda qaýqarsyz bolyp shyqty. Jabyq tıpte, ishine elektr jylytqysh qoıylyp jasalǵan pavılondar Arqanyń aıazynda ańyrap tur. Turǵyndar avtobýs kútip turǵanda jyly aıaldamaǵa kirip jylynǵannyń ornynda, ókshelerin bir-birine soǵyp, dalada jaýrap turýǵa májbúr. Sebebi keıbir aıaldamalar ishinde jylýdyń nyshany joq, ishi las. Al endi bir aıaldamalardyń esikteri tars jabyq. Jurtshylyq sýyq kúnderi qoǵamdyq kólikti uzaq kútip qalǵanda dalada tońyp turady. 

Kópshilik qala basshylyǵynan bul máseleni jedel sheshýdi surap otyr. Sebebi aıazdy kúnderi adamdardy jel men yzǵardan qorǵaıtyn pana osy ǵana. Olardyń ózi qala boıynsha sanaýly ǵana.

— Qazir qala boıynsha osyndaı 12 aıaldama bar. Onyń tórteýi kásipkerlerdiń jeke qarajaty esebinen salyndy. Qazir barlyq pavılondar jumys istep tur. Turǵyn úı-kommýnaldyq sharýashylyq bóliminiń mamandary kún saıyn turaqty negizde jyly aıaldamalarǵa monıtorıng júrgizedi. Olar bul nysandarǵa ózderi qyzmet kórsetedi. Jyly pavılondardyń basym bóligi qala ákimdiginiń esebinde tur, - dep habarlady Pavlodar qalasynyń ákimdiginen.

Jaýapty mekemelerdiń sózine súıensek, álgindeı aıaldamalar jylý jáne jaryq júıelerimen, jeldetkishtermen qamtylǵan. Ókinishke qaraı, bul ıgilikterdi kópshilik sezine almaı otyr.

Buǵan deıin Óskemende avtobýs júrgizýshileri men jolaýshylar aıaldamalardaǵy kóktaıǵaqqa shaǵymdanyp jatqany týraly jazǵan edik.