Pavlodarda jınalysqa daıyndyqsyz kelgen sheneýnik sógis aldy
Pavlodar oblysynyń Jolaýshylar kóligi jáne avtomobıl joldary basqarmasynyń basshysy Qanat Qashkırov apparat otyrysynda sógis aldy, dep habarlaıdy Kazinform.
Ol óńirdegi joldardyń qysqa daıyndyǵy týraly baıandama jasady. Alaıda aımaq basshysy baıandamanyń «sheneýnik» tilimen daıyndalǵanyna, Qanat Qashkırovtyń ózi aqparatpen durys tanys emes ekenine jáne naqty suraqtarǵa jaýap bere almaǵanyna narazylyǵyn bildirdi.
2023 jyly Pavlodar oblysynyń joldaryna 1,2 mlrd teńge bólingen. Al uzyndyǵy 2 849 shaqyrymdy quraıtyn aýdandyq mańyzy bar joldarǵa nebary 545 mln teńge bólingenin, bul normatıvke saı kelmeıtini aıtyldy. Pavlodar jáne Maıskıı aýdandaryna qys maýsymynda joldardy kútip ustaýǵa tıisti mólsherden az qarjy aýdarylǵan.
- Eki aýdannyń da bıýdjeti jaqsy bolǵanymen, bul aýdan ákimderin turǵyndardyń qaýipsizdigi alańdatpaıdy. Salalyq basqarma retinde búrkemelep sóıleýge bolmaıdy. Aımaqta myńdaǵan másele bar, oǵan men nazar aýdarýym úshin naqty aıtylýy kerek. Qazir qar joq delik. Olar únemdep otyrǵan shyǵar. Múmkin bul qarajat aýdandarǵa jetip te qalatyn shyǵar. Biraq qarjy artyǵymen qarastyrylýy kerek, - dedi oblys ákimi.
Jıyn barysynda joldardy qys maýsymyna daıyndaý kezinde keı jerlerde shópter orylyp, aǵash butalary qyrqylmaǵany jáne qardan qorǵaıtyn qalqalardyń ornatylmaǵany anyqtaldy. Bul jumystar oblystyń jeti aýdanynda júrgizilmegen. Vedomstvo basshysy Qanat Qashkırov solardyń úsheýin ǵana esine túsirdi – Baıanaýyl, Maıskıı jáne Pavlodar aýdandary.
Nátıjesinde Jolaýshylar kóligi jáne avtomobıl joldary basqarmasy basshysynyń baıandamasy Qanat Qashkırovtyń jınalysqa daıyn bolmaýyna baılanysty qabyldanbady. Aımaq basshysy qaramaǵyndaǵylardan jetekshilik etetin sala boıynsha kásibılik pen biliktilik talap etetinin basa aıtty.
Kólik jáne avtomobıl joldary basqarmasyna oblystyń ár aýdanyn aralap, joldardyń qysqa daıyndyǵyn tekserip, kelesi jıynda esep berý tapsyryldy. Bólim basshysyna sógis túrindegi tártiptik jaza berildi.
