Prezıdent Іs basqarmasy aýrýhanasy halyqaralyq standarttarǵa sáıkestigin dáleldedi
ASTANA. KAZINFORM — QR PІB Medıtsınalyq ortalyǵynyń aýrýhanasy ınfraqurylymdy keńeıtý aıasynda JCI halyqaralyq sapa mártebesin rastady.
QR PІB Medıtsınalyq ortalyǵynyń aýrýhanasynda qoldanystaǵy Joint Commission International (JCI) sertıfıkatynyń aıasyn keńeıtý boıynsha ınspektsııalyq aýdıt ótti. Atalǵan rásim 80 tósek-orynǵa arnalǵan jańa kópbeıindi statsıonar men 450 kelýshini qabyldaýǵa arnalǵan emhana ǵımaratynyń paıdalanýǵa berilýine baılanysty júrgizildi. Tekserý qorytyndysy boıynsha aýrýhana óz qyzmetiniń halyqaralyq akkredıtatsııa standarttaryna tolyq sáıkes keletinin taǵy bir márte dáleldedi. Bul akkredıtatsııa álemdik deńgeıdegi medıtsınalyq qyzmetterdiń qaýipsizdigi men sapasyn aıqyndaıtyn eń bedeldi baǵalaýlardyń biri sanalady.
JCI júıesi jahandyq densaýlyq saqtaý salasyndaǵy «altyn standart» retinde tanylǵan. Búginde ol álemniń 60 elindegi myńnan astam jetekshi memlekettik jáne jekemenshik medıtsınalyq uıymda engizilgen.
QR PІB MO aýrýhanasy 2016 jyldan beri osy halyqaralyq qaýymdastyqtyń qatarynda bolyp, 2019, 2022 jáne 2025 jyldary medıtsınalyq qyzmet sapasyn júıeli túrde rastady. Aýrýhana ınfraqurylymyn kezeń-kezeńimen damytý, onyń ishinde 2023 jyly 200 tósek-oryndyq emdeý korpýsy men Tsıklotrondy-óndiristik keshenniń ashylýy halyqaralyq hattamalarǵa sáıkestik talaptaryn qatań saqtaı otyryp júzege asyrylyp keledi.
— Kezekti ınspektsııalyq aýdıtten sátti ótý QR PІB MO aýrýhanasynyń patsıent qaýipsizdigin qamtamasyz etý men emdeý tıimdiligin arttyrý baǵytyndaǵy joǵary daıyndyǵyn taǵy da aıqyndady. Halyqaralyq sapa belgisiniń jańa ǵımarattarǵa da berilýi aýrýhananyń álemdik deńgeıdegi standarttarmen jumys isteıtin elimizdegi jetekshi medıtsınalyq mekemelerdiń biri ekenin taǵy bir márte dáleldedi, — delingen habarlamada.
Budan buryn QR PІB Medıtsınalyq ortalyǵy Qytaımen tsıfrlyq medıtsına boıynsha yntymaqtastyqty keńeıtip kele jatqanyn jazdyq.
