Pavlodarda 14 jasar álem chempıony turady

PAVLODAR. KAZINFORM — Pavlodarda Jan Shynǵoja atty 14 jasar chempıon bala turady. Osy ýaqytqa deıin jasóspirim birneshe álem chempıonatyn baǵyndyrǵan.

Jannyń jasy qazir 14-ke toldy. Sportqa jany qumar jasóspirim № 21 orta mektepte bilim alady. Ájesi Baqtyly Altybasarovanyń aıtýynsha, nemeresiniń sportqa qyzyǵýshylyǵyn qazirgi Qazaqstan taekvondo GTF federatsııasynyń prezıdenti Qalen Sultanǵazın oıatypty. Qalen aǵa Pavlodarda biraz jyldar taekvondo bapkeri bolǵany málim. Jasóspirimniń boıyndaǵy otty baıqaǵan sheber ony baýlyp, jarystarǵa apara bastaǵan.

— Jan — jalǵyz ulymnan týǵan bes nemeremniń úlkeni. Kishkentaıynan meniń janymda ósti. Erkeleý edi, sportqa baryp tártipti, jınaqy bola túskenin kórip máz boldyq. Qazir qaladaǵy «Praıd» klýbynda jattyǵyp júr. Alda Temirtaýda ótetin Qazaqstan chempıonaty, odan soń Shotlandııada bolatyn Álem birinshiligi tur. Osy jarystarǵa qatysyp, baǵyn synaıtyn oıy bar. Nemerem osy ýaqytqa deıin birneshe álem kýbogyna, chempıonattaryna qatysyp, júldemen oraldy. Barlyq básekelerden jıyny 60-tan astam medal ákeldi, - deıdi ájesi.

Búginge deıin jetken jetistikteri barshylyq. Máselen, 2018 jyly Armenııa elinde ótken jarysta Eýropa kýbogynyń kúmis júldegeri, 2022 jyly Kıpr Respýblıkasyndaǵy birinshilikte Eýrazııa kýbogyn ıelense, sol jyly QR chempıonatynyń jeńimpazy atandy. Reseı elderinde ótken ashyq chempıonattarda qarsylas shaq keltirmedi. Búginde bul sport túrinen qara belbeýdiń ıesi jáne sport sheberligine kandıdat.

— Tuńǵyshymyz — bizdiń otbasymyzdyń maqtanyshy! Al sport kez kelgen adamnyń deniniń saýlyǵy úshin qajet. Nemeremniń sportqa qyzyǵýshylyǵy joǵary bolǵanyna qýanamyn. Qazirgi tańda taekvondoǵa úzbeı baryp júr. Jarystarda jetistikke jetip, abyroıy asqaqtap jatsa, onda bizdiń mereıimizdiń tasyǵany, — dep qosty ájesi.

Jan Shynǵoja sportpen qosa oqýdy da qatar alyp júr. Ustazdary oqý úlgerimi jaqsy ekenin jetkizdi.

Eske sala keteıik, Oralda merekelik festıvalǵa 3 myń bala qatysty.