Pavlodar turǵyndary páterlerinde tońyp otyr

PAVLODAR. KAZINFORM - Kerekýde Arqanyń syqyrlaǵan sary aıazy báseńsigenimen, páterlerdi salqyndyq jaılap tur. Jylý jetispeýshiligi turǵyn úılerde ǵana emes, keıbir mektepter men emdeý uıymdarynda da baıqalǵan.

Oblys ortalyǵyndaǵy kópqabatty úılerdiń turǵyndary páterlerinde búrseńdep otyr.

Aıtýlarynsha, aıazdy kúnder aıaqtalǵanyna qaramastan, baspanalaryn sýyq jaılap alǵan.

Mundaı shaǵymdar Ýsolka, MDS, Hımqalashyq shaǵyn aýdandarynda jáne shahardyń ortalyq bóliginde kóp tirkelgen.

— Páterimiz salqyn. Aıazǵa deıin bólmelerde +29 gradýs temperatýra bolsa, qazir nebári +23 gradýs saqtalyp tur. Jylý batareıalarynyń qyzýy asa sezilmeıdi. Aıazdy kúnderi bólmeler sál-pál jyly bolǵan sııaqty. Al búgin úı ishi múlde azynap ketti, — dep muńyn shaqty Estaı kóshesi, 150/1 úıdiń Araı esimdi turǵyny.

Ata-analardyń aıtýynsha, mektepterdiń ishteri salqyn, keıbir synyptarda oqýshylar syrt kıimmen otyrǵan. Balalar úılerine tońyp oralyp jatyr. 

Buǵan qosa jergilikti aýrýhanalarda, atap aıtqanda, № 3 qalalyq aýrýhanada, oblystyq juqpaly aýrýlar aýrýhanasynda em alyp jatqan naýqastar palatalarynyń sýyq ekenine shaǵymdanǵan.

Qaladaǵy kóptegen PIK jertólege kelip turǵan jylýdyń temperatýrasy 60-72 gradýs mólsherinde ekenin habarlap otyr. Bul — normadan tómen.

Deıturǵanmen qalalyq ákimdik pen «Pavlodar jylý jelileri» JShS-niń mamandary oblys ortalyǵyndaǵy jylý-energııa ortalyqtarynan shyǵatyn jylý tasymaldaǵyshtardyń temperatýrasy 98 gradýs dep sendirip otyr.

— 19 qańtar kúngi málimet boıynsha Pavlodar qalasyndaǵy JEO-2 jáne JEO-3 dıspetcherlik elektr júktemesin bólý kestesine jáne jylý jelileriniń 98/57 gradýs temperatýralyq kestesine sáıkes shtattyq rejımde jumys istep jatyr. Pavlodar JEO-2-de 4 qazandyq agregat pen 3 týrboagregat, al JEO-3-te 6 qazandyq agregat pen 5 týrboagregat jumys istep tur. Jylytý maýsymy kezeńinde qala ákimdigi qurǵan 10 jumys komıssııasy qyzmet atqaryp jatyr. Komıssııa quramyna jylý ınspektsııasynyń, qyzmet kórsetýshi uıymdardyń jáne qala ákimdiginiń ókilderi kiredi, — dep habarlady qalalyq ákimdiktiń baspasóz qyzmetinen.

Atalǵan komıssııaǵa 13–19 qańtar aralyǵyndaǵy aıazdy kúnderi barlyǵy 10 ótinish túsken. Biraq olardyń birde-bireýinde jylýmen qamtý parametrleriniń buzylýy rastalmaǵan. Ótinishterdiń basym bóligi ishki jylý júıelerinde, panelaralyq jáne tereze tigisteriniń tutastyǵynda aqaýlary bar kópqabatty turǵyn úılerden kelip túsken. 

— Mundaı úılerdiń turǵyndaryna jylý jelileri qyzmetkerleri atalǵan máselelerdi joıý boıynsha tıisti usynystar berdi. Barlyq ótinishter jylý ınspektsııasy qyzmetkerlerimen jedel túrde qaralýda, qajet bolǵan jaǵdaıda jylýmen qamtýdy qalypqa keltirý sharalary qabyldanady, — dep qosty ákimdikten.

Buǵan deıin Pavlodardyń qaq ortasynda qubyr jarylyp, birneshe kósheni sý basqanyn jazǵanbyz.