Pavlodar polıtsııasy terakt týraly habardy tekserip jatyr

PAVLODAR. QazAqparat - Pavlodarda polıtsııa 42 jastaǵy er adamdy ustady. Ol mas kezinde telefon arqyly oıyn-saýyq mekemeleriniń birine bomba qoıylǵanyn aıtty degen kúdikke ilikken, dep habarlaıdy QazAqparat tilshisi.

«28 qazan kúni 02:28-de «102» operatoryna qaladaǵy oıyn-saýyq ortalyqtarynyń birine jarylǵysh zat qoıylǵany týraly habar keldi. Ǵımaratty tekserip shyqqan polıtseıler eshteńe tappaǵan. Jedel sharalar nátıjesinde 1976 jyly týǵan qala turǵyny ustaldy. Ol, saraptama qorytyndylaryna sáıkes, mas kezinde osylaı habar bergen degen kúdik bar», - dep málimdedi Pavlodar oblystyq polıtsııa departamentiniń baspasóz qyzmeti.

Departament ókilderiniń aıtýynsha, polıtsııa qyzmetkerlerine sol kúni keshennen 700-ge jýyq adamdy evakýatsııalaýlaryna týra kelgen.

«Osy derek boıynsha «Terrorıstik akt týraly kórineý jalǵan habar berý» babymen sotqa deıingi tergep-tekserý júrip jatyr», - deıdi polıtseıler.