Parlament depýtattary kanıkýlda tek demala ma

ASTANA. KAZINFORM – Májilis depýtaty Elnur Beısenbaev Jibek Joly telearnasynyń «Ýáde» baǵdarlamasyna bergen suhbatynda el turǵyndary qandaı máselelerdi jıi kóteretinin aıtty. 

— Kanıkýl degende dúıim jurt depýtattar demalady eken dep oılaıdy. Máselen, shildeniń basyndaǵy 15 kúnde árbir depýtat ózi saılanǵan óńirge nemese partııa tarapynan belgilengen aımaqqa baryp, qyzmet atqarady. Halyqpen kezdesedi. Bir mandatty okrýgten saılanǵan depýtat ózi saılanǵan aımaqqa baryp, saılaýshylarymen kezdesip úlgerýi tıis, — dedi ol.

Onyń atap ótýinshe, Amanat partııasynyń fılıaly barlyq óńirde bar, aýdandyq bólimsheler jumys isteıdi. Sondyqtan júıeli kezdesýler uıymdastyrylady.

— Tamyz aıynyń sońǵy 15 kúninde de depýtattar óńirlerde saılaýshylarmen kezdesip, máselelerdi jınap alyp keledi. Olardy biz ortalyqta sheshýge tyrysamyz. Tamyzdaǵy máselelerdi qazan men qarasha aılarynda bıýdjetti pysyqtaǵan kezde usynys retinde beremiz. Munyń aldyndaǵy partııanyń Parlamenttegi fraktsııasy qalaı jumys istegenin aıta almaımyn. Buryn fraktsııa otyrysy jylyna 2-3 ret qana bolatyn. Konstıtýtsııalyq reformadan keıin jylyna 21-22 otyrys ótkizip, máselelerdi talqylaımyz, problemalardy kóteremiz, — dedi Elnur Beısenbaev.

Osy oraıda ol qazirgi ýaqytta aldaǵy Prezıdent Joldaýyna daıyndyq júrip jatqanyn aıtty.

— Partıamyzdyń, fraktsııanyń, partııa tóraǵasynyń tarapynan usynystarymyzdy, problemalardy pysyqtap, «osyndaı máseler bar, aldaǵy Joldaýda osyny qarastyrýyńyzdy suraımyz ne sheshimin birge tabaıyq» dep Úkimetke, Memleket basshysynyń jumysyn úılestirip otyrǵan Prezıdent Ákimshiligine berdik, — dedi ol.

Májilis depýtatynyń aıtýynsha, óńirlerde eń aldymen jol, elektr energııasy jáne sý máselesi kóteriledi. Máselen, Úkimet dereginshe, elimiz 98-99 paıyz taza aýyz sýmen qamtamasyz etilgen. Alaıda, kóp óńirde qubyrlar eskirip jatyr. Olardy jańartpasa bolmaıdy. Odan keıin elektr jelileriniń 70 paıyzdan astamy eskirgen. Investıtsııa tartýda túıtkildi problemalar bar.