Parıjde krıptovalıýtalyq mıllıonerdiń qyzy qaraqshylarǵa tap boldy
ASTANA. KAZINFORM — Serigi jáne kishkentaı balasymen serýendep júrgen áıelge tańǵy segiz jarym shamasynda Parıjdiń 11-shi aımaǵyndaǵy kóshelerdiń birinde shabýyl jasalǵan, dep habarlaıdy Euronews.
Kadrlarda betin búrkegen úsh shabýyldaýshy áıeldi aq fýrgonǵa kúshtep otyrǵyzbaq bolǵany, olarǵa serigi men ótip bara jatqan adamdar qarsylyq tanytqany kórsetilgen.
Ótip bara jatqan adam shabýyldaýshylardyń biriniń jerge qulaǵan tapanshasyn alsa, basqa adam olardy órt sóndirgishpen urmaq bolǵan. Sátsizdikke tap bolǵan qaraqshylar tez ketip qaldy.
🔴 Paris : Un homme et une jeune femme échappent à une tentative d'enlèvement en pleine rue dans le XIe arrondissement, trois suspects en fuite, l'enquête confiée aux policiers de la BRB https://t.co/6aTpw4uROh pic.twitter.com/z4btH12dp7
— Actu17 (@Actu17) May 13, 2025
Sońǵy aılarda Frantsııa men Eýropadaǵy krıptovalıýta bıznesindegi tanymal tulǵalardy jáne olardyń otbasy múshelerin urlaý nemese urlaýǵa áreket jasaý oqıǵalary kóbeıip ketkeni habarlanyp otyr.
Mamyr aıynyń basynda krıptovalıýtalyq mıllıonerlerdiń biriniń ákesi Parıjdiń 14-shi aımaǵynda ıtimen serýendeý kezinde urlanyp, úsh kún tutqynda boldy.
Urlaǵandar ony bosatý úshin qomaqty tólem talap etip, ulyna onyń kesilgen saýsaǵyn túsirgen beınejazbany jibergen, dep habarlady frantsýzdyq Franceinfo telekompanııasy.
Osy arada qańtarda frantsýzdyq Ledger krıptovalıýtalyq kompanııasynyń negizin qalaýshy 36 jastaǵy Devıd Balland pen onyń seriktesi Frantsııanyń soltústiginde ornalasqan Mereo shaǵyn kommýnasyndaǵy úıinen urlanǵan bolatyn.
Ledger negizin qalaýshy Erık Larchevek krıptovalıýtadaǵy tólem suranysymen birge Ballandtyń kesilgen saýsaǵy týraly beıneni alǵannan keıin dabyl qaqqan.
Sondaı-aq krıptovalıýtamen aınalysatyndar men olardyń týystary Ispanııa men Belgııada jaqynda urlaý áreketterine tap bolǵany habarlandy.
Buǵan deıin AQSh prezıdenti Donald Tramp eldegi alǵashqy tsıfrlyq aktıvterdiń memlekettik rezervin qurý týraly jarlyqqa qol qoıǵanyn jazǵan bolatynbyz.
Sondaı-aq Qazaqstan Ulttyq banki «steıblkoın» degen ataýmen óz tsıfrlyq aktıvin shyǵarýdy josparlap otyrǵanyn habarladyq.