Pákistanda «Qazaqstan úıi» ashyldy

LAHOR. QazAqparat - Qazaqstan Elshisi Erjan Qystafın Lahor qalasyna jumys saparymen bardy. Sapar aıasynda Pákistanda alǵashqy «Qazaqstan úıiniń» saltanatty ashylý rásimi ótti, dep habarlaıdy QazAqparat.

Qazaqstan úıin ashýdyń negizgi maqsaty – Pákistan azamattaryna qyzmetterdiń keń spektrin usyný jáne «bir tereze» qaǵıdaty boıynsha keńes berý. Onda qazaqstandyq vıza máseleleri boıynsha qoldaý kórsetý múmkindigimen qatar týrızm, mádenıet, bilim berý, saýda jáne ınvestıtsııalar salasyndaǵy yntymaqtastyqty damytý bólimderi usynylǵan.

Pendjab provıntsııasynyń gýbernatory M. Balıg-ýr-Rehman jáne Lahor qalasynyń komıssary M. Álı Randhava barlyq qatysýshylardy Qazaqstan úıiniń ashylýymen quttyqtap, bul qadam Qazaqstan-Pákistan qatynastary tarıhynyń jańa kezeńin belgileıtinin atap ótti. E. Qystafın Qazaqstan úıi ekijaqty qatynastardy nyǵaıtýǵa jáne eki el halyqtaryn jaqyndastyrýǵa qyzmet etetinine senim bildirdi.