Ózbekstannyń halyqaralyq rezervteri alǵash ret 50 mıllıard dollardan asty
ASTANA. KAZINFORM — 2025 jyldyń 1 qyrkúıegine Ózbekstannyń altyn-valıýta qory 50,08 mlrd dollar boldy. Rezervterdiń quny ótken aımen salystyrǵanda 1,34 mıllıard dollarǵa artyq. Bul týraly Ózbekstan Ortalyq banki usynǵan esepte aıtylǵan.
Tamyz aıynda rezervterdiń valıýtalyq bóligi 49 mıllıon dollarǵa azaısa, altyn bóligi 1,38 mıllıard dollarǵa ósip, 40 mıllıard dollarǵa jetti.
Qorlardaǵy altynnyń fızıkalyq kólemi de 11,7 mıllıon troıa ýntsııasynan 11,8 mıllıon troıa ýntsııasyna deıin ósti.
Álemdik naryqtaǵy altyn baǵasynyń kóterilýi aıasynda Ózbekstannyń altyn-valıýta rezervi jyl basynan beri aıtarlyqtaı ósti. 1 qyrkúıekte tirkelgen 50 mıllıard 87 mıllıon dollarlyq qor el úshin tarıhı rekord bolyp tabylady.
Buǵan qosa, Ortalyq bank satyp alǵan baǵaly qaǵazdardyń quny ótken aıda azdap ósip, 1,16 mıllıard dollarǵa jetti.
Jyl basynan beri altyn baǵasynyń kúrt ósýi álemdik naryqqa tikeleı baılanysty. Aqpan-mamyr aılarynda altyn álemdik geosaıası shıelenis pen AQSh-tyń Federaldy rezervtik júıesiniń saıasatyna baılanysty kúrt kóterildi.
Shildede qysqa merzimdi quldyraý baıqaldy. Tamyz-qyrkúıek aılarynda baǵa qalpyna kelip, osy kezeńde 3,4%-ǵa ósti. Sarapshylardyń pikirinshe, bul úrdis maýsymdyq suranyspen (ásirese Azııa naryǵyndaǵy kúzgi toı maýsymy) jáne álemdik ekonomıkalyq belgisizdikpen túsindiriledi. 5 qyrkúıekte altynnyń baǵasy tarıhta alǵash ret ýntsııa úshin 3570 dollardan asty.
Eske sala keteıik, shilde aıynda Ózbekstannyń altyn-valıýta rezervteri 48,74 mıllıard dollarǵa deıin ósken edi.