Ózbekstanda jańa qazaq mektebi paıdalanýǵa berildi
Ózbekstannyń Bostandyq aýdanyna qarasty Jańaaýyl eldi mekeninde jańadan salynǵan qazaq mektebi padalanýǵa berildi, dep habarlaıdy Kazinform.
Jańa mektep boı kótergen jerde buǵan deıin 1963 jyly salynǵan bilim ordasy bolǵan. Ol sol kezde osy aýyldaǵy qazaq tilindegi eń úlken mektep sanalǵan. Al 2008 jyly onyń janynan ekinshi keshen salynyp, eki bólik te bir bilim ordasyna tıisili boldy. Al bıyl eski mektep súrilip, onyń ornyna jańa ǵımarat qurylyp otyr.
«Kezinde basqa mektepter 8 jyldyq bolsa, bul mektep 10 jyldyq bolǵan. Ol ýaqyttarda munda 8 synyp ornalasqan, eki aýysymda tolyq oqyǵan. Jalpy sany 500 bala bilim alatyn. Al 2008 jyly memlekettiń qoldaýymen eski mekteptiń janynan 300 oryndyq taǵy bir bilim ordasy qurylyp, ekeýi bir mektep sanaldy. Onda sabaq berýge arnalǵan 10 synyp bar. Osy mektepti salý kezinde sportzaldyń qurylysy aıaqtalmaı qaldy. Biz biraz jerge shaǵym túsirdik, aýyl azamattary birshama jerge bardy. Sonyń nátıjesinde 1963 jyly salynǵan mekteptiń ornyna 120 bilim alýshyǵa shaqtalǵan mektep quryldy. Onyń ishinde 100 adamǵa eseptelgen akt zaly, zaman talabyna saı 12h24 ólshemindegi sportzal bar», - dedi mektep dırektory Álıasqar Qurbanbaev.
Jańa bilim ordasynda tek bastaýysh synyptar oqıdy. Qazir mekteptiń qos bóliginde jalpy sany 420-ǵa jýyq oqýshy bilim alyp júr.
«Biz 2022 jyly qujattardy rásimdeý jumysymen aınalystyq. Keıin el úkimeti bul mekteptiń qurylysyn 2023 jyldyń josparyna engizip berdi. Qurylysy bıyl qazan aıynda aıaqtaldy. Bilim ordasy barlyq zaman talabyna saı keledi», - dedi mektepti salǵan qurylys kompanııasy dırektorynyń orynbasary Uldana Dáýletova.
