Ózbekstanda Qazaqstan medıtsınasy kúnderi ótedi
TAShKENT. KAZINFORM — Tashkentte Ózbekstan Densaýlyq saqtaý mınıstri Asylbek Hýdaıarov QR Densaýlyq saqtaý mınıstri Aqmaral Álnazarovamen kezdesti, dep habarlaıdy ÓR DSM baspasóz qyzmeti.
Kezdesý barysynda atap ótilgendeı, sońǵy jyldary eki el arasyndaǵy densaýlyq saqtaý salasyndaǵy ózara tıimdi yntymaqtastyq jańa deńgeıge kóterildi.
Atap aıtqanda, birqatar medıtsınalyq ýnıversıtet arasynda oqytýshylar men stýdentter almasý, birlesken ǵylymı zertteýler júrgizý jáne mamandardyń biliktiligin arttyrý, sheberlik sabaqtary men demonstratsııalyq hırýrgııalyq operatsııalar jolǵa qoıylǵan.
2024/2025 oqý jylynan bastap Buhara memlekettik medıtsına ınstıtýty men QR Ulttyq ınstıtýtymen birlesip, birlesken bilim berý baǵdarlamasy júzege asyrylýda.
Respýblıkanyń mamandandyrylǵan ǵylymı-praktıkalyq medıtsınalyq ortalyqtary da Qazaqstannyń bedeldi klınıkalarymen tájirıbe almasady. Ásirese, ana men bala densaýlyǵyn saqtaý baǵytyndaǵy yntymaqtastyq óz nátıjesin berip jatyr.
Farmatsevtıka salasynda da baılanys nyǵaıyp keledi. Atap aıtqanda, 2023-2024 jyldary Ózbekstanda Qazaqstannan dári-dármektiń 149 túri, medıtsınalyq maqsattaǵy buıymdar men medıtsınalyq tehnıkanyń 37 túri, al Ózbekstan óndirýshileriniń 98 farmatsevtıkalyq ónimi Qazaqstanda tirkelgen.
Eki el arasynda vaktsına sertıfıkattaryn ózara taný týraly kelisimge qol qoıyldy.
Eki el basshylary ótken kóktemde Astanada ótken ShYU densaýlyq saqtaý mınıstrleriniń VII otyrysy aıasynda kezdesken bolatyn. Bıyl Jenevada ótken Dúnıejúzilik densaýlyq saqtaý uıymy Assambleıasynyń 77-sessııasy aıasynda Asylbek Hýdaıarov Aqmaral Álnazarovamen de kezdesti. Bıyl Astanada Túrki memleketteri uıymyna múshe elder densaýlyq saqtaý mınıstrleriniń besinshi otyrysy uıymdastyryldy.
Bul basqosýda Ózbekstanda qazaq medıtsınasy kúnderin ótkizý jáne ony Aral óńirinde bastaý, joǵary medıtsınalyq oqý oryndary arasyndaǵy dıplomdardy ózara taný máseleleri talqylandy.
Sonymen qatar balalar onkogematologııasyn, orfandyq aýrýlardy emdeý, kardıohırýrgııa, onkologııa, farmatsevtıka, medıtsınalyq saqtandyrý jáne alǵashqy medıtsınalyq-sanıtarlyq kómekti damytý perspektıvalary qarastyryldy.
Sonymen qatar salany damytýdyń negizgi faktorlarynyń biri medıtsına mamandaryn daıarlaýdy, qaıta daıarlaýdy jáne olardyń biliktiligin arttyrýdy yntymaqtastyqta kúsheıtý bolyp tabylatyny atap ótildi.
Kezdesý sońynda taraptar eki eldiń densaýlyq saqtaý mınıstrlikteri arasyndaǵy 2025-2026 jyldarǵa arnalǵan yntymaqtastyqty damytýdyń negizgi is-qımyl josparyna qol qoıdy.
Eske sala keteıik, Qazaqstan men Ózbekstan arasyndaǵy taýar aınalymy 1,4 mlrd dollarǵa jýyqtady.