Ózbekstan prezıdenti 523 adamǵa raqymshylyq jasady
ASTANA. KAZINFORM - Shavkat Mırzıeev Ózbekstan Respýblıkasy táýelsizdiginiń 34 jyldyǵy qarsańynda «Jazasyn ótep jatqan, jasaǵan isine shyn ókingen jáne túzelý jolyna nyq qadam basqan bir top azamatqa raqymshylyq jasaý týraly» jarlyqqa qol qoıdy, dep habarlaıdy ÓR prezıdentiniń baspasóz qyzmeti.
Jarlyqqa sáıkes, Ózbekstan Respýblıkasy Konstıtýtsııasynyń 109-baby 23-tarmaǵyna negizdele otyryp, jazasyn ótep jatqan jáne jasaǵan isine shyn ókingen ári túzelý jolyna nyq qadam basqan 523 adamǵa raqymshylyq jasaldy.
Raqymshylyq jasalǵandardyń ishinde 195 adam negizgi jazadan tolyq bosatyldy, 147 adam jazasyn óteýden merziminen buryn shartty túrde bosatyldy, 87 adamnyń bas bostandyǵynan aıyrý jazasy jeńilirek jazaǵa aýystyryldy. Sondaı-aq 94 adamnyń bas bostandyǵynan aıyrý merzimi qysqartyldy.
Keshirilgenderdiń qatarynda 8-i shetel azamaty, 45-i áıel, 31-i jasy 60-tan asqan er adam, 220-i jastar (onyń ishinde 1 kámeletke tolmaǵan). Sondaı-aq 15 adam tyıym salynǵan uıymdar qyzmetine qatysqandar quraıdy.
Jarlyqtyń oryndalýy aıasynda keshirilgen azamattardy otbasyna jáne jaqyndarynyń qasyna qaıtarý, qoǵamǵa beıimdelip, paıdaly eńbekpen aınalysýy, salaýatty ómir saltyn jolǵa qoıýy jáne qoǵamda laıyqty oryn tabýyna kómek kórsetý boıynsha tıisti mınıstrlikter men vedomstvolarǵa naqty tapsyrmalar berildi.
Eske sala keteıik, Ózbekstan basshysy Oraza aıt qarsańynda 488 adamǵa raqymshylyq jasaǵany jaıly jazǵan edik.