Ózbekstan halqynyń úshten birinde aqsha jınaǵy joq
ASTANA. Kazinform — Ózbekstanda halyqtyń 34%-y aqsha jınamaǵan. Bul týraly Ortalyq bank júrgizgen kassalyq operatsııalardy uıymdastyrý jáne qolma-qol aqshamen esep aıyrysýdyń jaı-kúıi týraly saýalnama nátıjeleri týraly esepte aıtylady.
Bıylǵy jyldyń maýsym aıynda Ózbekstan halqy arasynda kassalyq operatsııalardy uıymdastyrý jáne qolma-qol aqshamen esep aıyrysý máseleleri boıynsha elektrondy saýalnama júrgizilip, oǵan 14 259 respondent qatysqany atap ótildi.
Saýalnama nátıjesine sáıkes, turǵyndardyń 15-y kúndelikti tólemdi negizinen qolma-qol aqshamen, 33%-y bank kartasymen, 52%-y eki tólemdi de júzege asyrady.
Taýarlardy (qyzmetterdi) qolma-qol aqshamen satyp alý sebebine qatysty saýalnamaǵa qatysýshylardyń 56%-y saýdany negizinen bazarlardan jasaıtynyn, 17%-y tez, qaýipsiz jáne baqylaýǵa ońaı ekenin, 13%-y taýardyń (qyzmetterdiń) qolma-qol aqshamen arzan bolatynyn, 7%-y tólem úshin qolma-qol aqsha qajet ekenin, taǵy 7%-y tólem termınaly jumys istemeıtinin aıtty.
Tólemge qolma-qol aqshany talap etýdiń eń joǵary kórsetkishi Ándijan, Qashqadarııa, Samarqand, Syrdarııa jáne Tashkent oblystarynda tirkelse, tólem termınaldarynyń bolmaýy nemese jumys istemeýi Tashkent qalasynda jıi bolatyny atap ótildi.
Respondentterdiń 87%-y jalaqysyn bank kartasymen, 7%-y qolma-qol aqshamen jáne bank kartasymen, 6%-y qolma-qol aqshamen alatynyn atap ótti. Turǵyndardyń 62%-y bankomattarǵa shaǵymdary joqtyǵyn, 18%-y úzilisterdiń sırek jaǵdaılarda baıqalatynyn, biraq qarsylyq bildirmeıtinin, al qalǵan 20%-y qolma-qol aqshanyń tez bitetinin, termınaldardyń jıi isten shyǵatynyn jáne qajetti nomınaldaǵy banknottardyń joqtyǵyn aıtty.
Turǵyndar jınaqtarynyń 23 paıyzyn qolma-qol aqshada, sol somany bank kartalarynda, 20 paıyzyn bankterdegi jınaq shottarynda saqtaıtynyn aıtsa, 34 paıyzy jınaqtary joq ekenin aıtty.
Saýalnamaǵa qatysqandardyń 52%-y memlekettik qyzmetshiler, 19%-y jeke sektor ókilderi, 17%-y bıýdjettik uıymdardyń qyzmetkerleri boldy.
Eske sala keteıik, Ózbekstanda gaz óndirisi 3,1 paıyzǵa tómendedi.