Ózbekstan astanasynda qaıyr tileýshilerge qarsy reıd bastaldy
TAShKENT. KAZINFORM – Tashkent qalasynyń kóshelerde qaıyr suraýmen aınalysatyndardy anyqtaýǵa baǵyttalǵan reıd júrip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Tashkent qalalyq bas ishki ister basqarmasynyń málimetinshe, meshit, joldardyń boıy men qıylystarda qaıyr suraýdy kásip etken 26 áıelge qatysty ákimshilik hattama toltyrylǵan. Sonymen qosa, olardyń janynda bul iske tartylǵan 13 kámeletke tolmaǵan balanyń bolǵany anyqtalyp, búldirshinder áleýmettik qorǵaý ortalyǵyna ornalastyryldy.
Buǵan qosa, jedel aldyn alý is-sharasy barysynda qaıyr tileýshilermen birge úsh bóten balanyń júrgeni belgili boldy. Olar ata-analaryna qaıtaryldy.
Aıta keteıik, Ózbekstan zańnamasyna saı, qaıyr suraǵan azamattarǵa ákimshilik jaýapkershilik qarastyrylǵan. Eger mundaı áreket qaıtalanyp jasalatyn bolsa, onda qylmystyq jaza qoldanylýy múmkin.
