Otyrarda jas mamandarǵa áleýmettik turǵyn úı beriledi

TÚRKІSTAN. QazAqparat - Túrkistan oblysy, Otyrar aýdanynyń ákimi Erlan Aıtahanovtyń qatysýymen jastarmen jumys júrgizý jónindegi keńestiń kezekten tys otyrysy ótti. Basqosýǵa zııaly qaýym men belsendi jastar jáne BAQ ókilderi qatysty, dep habarlaıdy QazAqparat tilshisi.

Jastar jylynyń ashylýy men sol jıynda Elbasy Nursultan Nazarbaevtyń bergen tapsyrmalary kezekten tys otyrysqa arqaý boldy. Aýdan basshysy Ult Kóshbasshysy tapsyrmasynyń ereksheligine toqtalyp, aldaǵy atqarylar jumystardy aıtyp ótti.

Ákim Jastar resýrstyq ortalyǵynyń jańadan taǵaıyndalǵan dırektory - keńes hatshysy, aıtysker aqyn Dáýren Aqsaqalovty kópshilikke tanystyryp, josparlaryna senim bildirdi. Jıynda Qazaqstannyń halyq aqyny, «Parasat» ordeniniń ıegeri Áselhan Qalybekova Jastar jylynyń ashylýymen quttyqtap, tolǵamdy oılarymen bólisti. Al, jas kásipker Ashat Tasybaev pen arheolog Shynaz Almazuly jáne dástúrli ánshi Uljalǵas Ábildahandar óz salalary boıynsha jetistikterine toqtaldy.

Aıta ketsek, búgingi tańda Otyrar aýdanyndaǵy jastar sany 13 162 adamdy quraıdy. Olardyń bos ýaqytyn tıimdi paıdalaný men qoldaý kórsetý, túrli salalar boıynsha baǵyt-baǵdar berý men shyńdalýyna jol ashý maqsatynda mádenıet, bilim, sport salalarynan túrli úıirmeler jumys isteıdi. Aýdanda sondaı-aq jas mamandarmen qamtý jáne jumyssyzdyqpen kúres máselesi de basty nazarda. Jıyn barysynda osy jáıtter jóninde oı bólisken aýdan basshysy Jastar ortalyǵy men jumyspen qamtý jáne áleýmettik baǵdarlamalar bólimi basshylaryna jumyssyz jastardyń naqty sanyn anyqtap, kásiptik bilim berý jáne jumysqa ornalastyrý máselesin birinshi kezekte qolǵa alýdy tapsyrdy. Kásipkerlik salasyna jol ashyp, qoldaý bildirý de keńinen talqylandy.

Sondaı-aq, Erlan Aıtahanov aýdanda boı kóterip jatqan áleýmettik úılerdiń basym bóligi jas mamandarǵa beriletinin jetkizdi. Basqosýda budan ózge qoǵamda oryn alyp jatqan quqyqbuzýshylyqtardyń aldyn alý, tártibi qıyn jastarmen tıimdi jumys júrgizý máselesi de qozǵaldy.

«Qoǵamnyń qozǵaýshy kúshi, egemen eldiń erteńi bolatyn jastar máselesi tek bıylǵy jylmen shektelmeı, jas mamandardy pátermen jáne jumyspen qamtamasyz etýdi árdaıym basty nazarda ustaıtyn bolamyz. Jastarǵa qoldaý kórsetý, oqytý, jumyspen qamtý baǵytyndaǵy árbir jumysqa aýyldyq okrýg ákimderi men ár salanyń basshylary da tikeleı atsalysatyn bolady»,-dedi sózin qorytyndylaǵan aýdan basshysy.

Ol tıisti merzimderdi kórsete otyryp, sala basshylaryna birqatar aýqymdy tapsyrmalar júktedi.