Roman Sklıar jylytý maýsymyna qatysty birqatar tapsyrma berdi
ASTANA.KAZINFORM -Premer-mınıstrdiń birinshi orynbasary Roman Sklıardyń tóraǵalyǵymen ótken jylytý maýsymynyń qorytyndysy jáne aldaǵy jylytý maýsymyna daıyndyq týraly jıyn ótti. Bul týraly Úkimettiń baspasóz qyzmeti habarlady.
Jıyn barysynda 2025-2026 jylǵy kúzgi-qysqy kezeńdegi jylytý maýsymynyń aıaqtalýy, osy jylǵa arnalǵan jóndeý naýqany, sondaı-aq problemalyq máselelerdi joıý týraly baıandamalar tyńdaldy.
Júıeli uıymdastyrylǵan jumystyń arqasynda jylytý kezeńi óńirlerde turaqty ótti, iri tehnologııalyq buzylýlar baıqalmady. Tutynýshylar elektr jáne jylý energııasymen tolyq qamtamasyz etildi.
Ótken jyly elektr stansalarynda 10 energoblokta, 63 qazandyqta jáne 39 týrbınada jóndeý jumystary júrgizildi. Elektr jelilerinde 17 myń shaqyrym elektr berý jelileri, 420 qosalqy stansa jóndeldi. Sondaı-aq 323 shaqyrym jylý jelileri qaıta jańartylyp, aýystyryldy.
Aldaǵy jylytý maýsymyna daıyndyq sheńberinde elektr stansalarynda bekitilgen kestege sáıkes bıyl 9 energoblokty, 55 qazandyqty jáne 51 týrbınany jóndeý josparlanǵan. Búgingi tańda bir qazandyq pen bir týrbınada jóndeý jumystary aıaqtaldy.
Jıyn qorytyndysy boıynsha Premer-mınıstrdiń birinshi orynbasary Roman Sklıar Energetıka mınıstrligine jáne óńirlik basqarmalardyń basshylaryna energetıka obektileriniń aldaǵy jylytý maýsymyna daıyndyq barysyn turaqty baqylaý jáne aǵymdaǵy máselelerdi sheshý úshin ýaqytyly sharalar qabyldaý týraly tapsyrma berdi.
Aıta keteıik, Premer-mınıstr Oljas Bektenov Astananyń úshinshi jylý-elektr ortalyǵyna baryp, Prezıdenttiń jańa qýat kózderin jańǵyrtý jáne iske qosý tapsyrmasy aıasynda energetıkalyq ınfraqurylymnyń damýyn teksergen edi.
