Otandyq qurylys materıaldarynyń úlesi qansha
ASTANA. KAZINFORM - QR Ónerkásip jáne qurylys mınıstrligi osy jyly Qazaqstanǵa shetelden qandaı qurylys materıaldary jetkizilip jatqany jaıynda túsinik berdi.
«Qurylys materıaldary boıynsha otandyq ónimderdiń úlesindn 2020 jyl men 2024 jyl aralyǵynda ósim boldy, ıaǵnı 13 paıyzdyq kórsetkishke ulǵaıdy. 2024 jyldyń qańtar-tamyzy aralyǵynda otandyq ónim úlesi 66,8 paıyzdy kórsetti. Shetelden jetkiziletin negizgi materıaldardyń arasynda mármár, travertın, alebastr, shlakty maqta, mıneraldy ári sılıkatty maqtalar bar», - delingen mınıstrliktiń Kazinform agenttigine bergen jaýabynda.
Qazaqstan naryǵy myna materıaldarmen tolyqtaı qamtamasyz etilgen: portlandtsement, taýarly beton, gıps, qurylys eritindileri jáne gıpsty karton.
«Sonymen qatar, 2024 jyldyń qyrkúıeginde joba quny 43,8 mlrd teńge bolatyn zaýyt iske asyryldy. Osy zaýyttyń ashylýymen jylý oqshaýlaǵysh materıaldaryna qatysty 100 paıyzǵa ishki naryqty qamtıdy jáne shetelge eksporttaýǵa múmkindik týady», - delingen vedomstvo aqparatynda.
Munymen qosa ımportqa táýeldi taýar túrleri de bar. Olardyń arasynda edenge tóseıtin ónimderdi (lınoleým), túsqaǵazdar jáne sanfaıans sııaqty ónimdi atap ótken jón.
Bıyl kóktemde Premer-Mınıstrdiń orynbasary-Ulttyq ekonomıka mınıstri Nurlan Baıbazarov keıbir qurylys materıaldary boıynsha tolyq ımportqa táýeldi ekenimizdi aıtqan edi.
