Óskemende oqýshylar sabaqty 7.30-da bastamaıtyn boldy

ÓSKEMEN. KAZINFORM — Óskemen qalasynda mektep oqýshylary sabaqty burynǵy keste boıynsha oqı beretin boldy.

20 naýryzdan bastap Óskemende memlekettik organdar men bıýdjettik uıymdar jańa jumys kestesine kóshken bolatyn. Soǵan sáıkes jumys kúni saǵat 08:00–de bastalyp, 17:30–da aıaqtalady, túski úzilis 12:00–den 13:30–ǵa deıin.

Osyǵan baılanysty mektepterde sabaq nesheden bastalady degen másele týyndady. Eki nusqa boldy: 8.00 nemese 7.30. Sóıtip, eki ýaqyt ata-analar arasynda daýysqa salyndy. Keıbir mektepter jańartylǵan jumys ýaqytyn saǵat 7:30–dan bastap qoldaı da bastady. Alaıda basym kópshiligi qarsy daýys bergen.

— Daýys berý qorytyndysy boıynsha ata-analardyń kópshiligi sabaqty saǵat 8:00–de bastaý týraly sheshim qabyldady. Sondyqtan tórtinshi toqsanda sabaq kestesinde eshqandaı ózgeris bolmaıdy. Óskemendegi barlyq mektepte sabaq saǵat 8:00–de bastalady, — deıdi qalalyq bilim bólimi basshysynyń mindetin atqarýshy Dına Sháripova.

Eske salsaq, buǵan deıin Óskemende jumys ýaqyty 1 saǵatqa shegerilgeni habarlanǵan.