Óskemende ekinshi kún qatarynan aýa lastanyp tur
ÓSKEMEN. KAZINFORM – Óskemen qalasynda qatarynan ekinshi kún qolaısyz meteorologııalyq jaǵdaı qalyptasty.
«Qazgıdromet» RMK málimetinshe, aýa sapasyna júrgizilgen monıtorıng barysynda kúkirt dıoksıdi men kúkirtsýtek boıynsha ruqsat etilgen shekten asý faktisi tirkeldi.
Kúkirt dıoksıdi normadan 2,078 ese, kúkirtsýtek 1,5 ese artqan. Sondaı-aq kómirtegi totyǵynyń kontsentratsııasy 1,025 ese asyp ketken.
– 27 aqpanda da qalada qolaısyz meteorologııalyq jaǵdaı qalyptaspaq. Soǵan baılanysty aýanyń lastaný deńgeıi joǵary bolady dep kútiledi, – delingen habarlamada.
Bul joly QMJ-nyń birinshi dárejesi jarııalanyp otyr. ıAǵnı tolyq tynyq bolmaı, azdaǵan jel soǵady.
Aýaǵa taraıtyn kúkirt dıoksıdi men kúkirtsýtek kórsetkishteriniń joǵarylaýy turǵyndardy alańdatyp otyr. Olar Óskemenniń atmosferalyq aýasyn lastaıtyn negizgi komponentterdiń qataryna jatady.
– Aýada gazdyń ıisi anyq sezilip, aýyzǵa temirdiń dámi keledi. Balalar úshin alańdaımyz. Búgin oqýshylardyń aıazǵa baılanysty úıde otyrǵandary jaqsy boldy, – deıdi qala turǵyny Marına Balkına.
Ekologtar QMJ kezinde kásiporyndarǵa baqylaý kúsheıtilip, ondaǵy óndiris qýatyn azaıtý jóninde usynymdar beriletinin jetkizdi. Alaıda jel men jaýyn-shashyn bolmaǵan jaǵdaıda tipti qysqa merzimdi shyǵaryndylardyń ózi aýa sapasyna eleýli áser etýi múmkin.
Eske salsaq, osyǵan deıin Rıdderdegi kásiporynda ekologııalyq talaptardy buzýdyń 5 faktisi anyqtalǵany habarlanǵan.