Óskemende 1 aqpannan bastap jylý tarıfi ózgeredi
ÓSKEMEN. KAZINFORM – Óskemen qalasynda aqpan aıynan bastap jylý tarıfi ózgeredi.
Óskemende jylý baǵasy aqpan aıynan bastap 19%-ǵa ósedi. «Shyǵys jylý» AQ alǵashqyda tarıfti 26% ósirýdi suraǵan. Alaıda ShQO tabıǵı monopolııalardy retteý departamenti bul usynysty quptamady. Buǵan deıin jylý baǵasy ótken jyldyń qarashasynda ǵana kóterilgen.
Jańa tarıfter:
• Ortaq esepteý qurylǵysy bar páterler – 3 992 tg/Gkal
• Esepteý qurylǵysy joqtar – 5 670 tg/Gkal
• Kólemi 100 sharshy metrden asatyn jer úıler – 4 391 tg/Gkal (qurylǵysy bar), 6 237 tg/Gkal (qurylǵysyz)
• Kólemi 200 sharshy metrden asatyn úıler – 7 926 tg/Gkal
Qurylǵysy bar bıýdjettik uıymdar – 25 729 tg/Gkal, qurylǵysyz – 38 593 tg/Gkal tóleıdi. Kásip ıeleri úshin jańa tarıftiń quny – 13 366 tg/Gkal.
«Shyǵys Jylý» AQ basqarmasy jylý baǵasyn ósýine jylý jelileriniń 63%, qazandyqtyqtardyń 69% tozýy sebep dep otyr. Odan basqa kómir men elektr energııasynyń qymbattaýy jáne mamandardyń jetispeýi de tarıf baǵasynyń ósýine yqpal etken.
- Kompanııada jylýmen úzdiksiz qamtamasyz etýshi 753 maman jumys isteıdi. Alaıda jalaqynyń azdyǵynan 159 qyzmetker jumystan ketken. Onyń ishinde 100-den astam jumysshy, 49 maman jáne 10 basshy bar. Tehnıkalyq qyzmetkerlerdiń eńbekaqysy 190 myń teńgeden aspaıdy, - dedi «Shyǵys Jylý» AQ tehnıkalyq dırektory Ashat Buqatov.
«Shyǵys Jylý» AQ 2025 jyly 7,5 mlrd teńgeni jylýmen jabdyqtaý júıesin jańartýǵa jumsamaq. Atap aıtqanda, qarajattyń 54% jylý energııasyn satyp alýǵa, 24% qyzmetkerlerdiń jalaqysyn kóterýge, 15% jeliler men qazandyqtardy jańartýǵa, 7% otynǵa jumsalady.
Bólingen qarjy Jańa Ahmer aýylyndaǵy qazandyqty jańartý jáne jylý jelileriniń 14 ýchastkesin jóndeýge de quıylmaq. Bul júıeniń tozýyn tómendetip, kómir shyǵynyn 841 tonnaǵa azaıtady.
- Sondaı-aq «Óskemen JEO» kompanııasy jáne «Shyǵys Jylý» 4,2 mlrd teńge kóleminde ınvestıtsııa tartýdy josparlap otyr. Bul qarajat kúrdeli jóndeýge jumsalady, - dedi ShQO boıynsha Tabıǵı monopolııalardy retteý departamenti basshysynyń mindetin atqarýshy Jumagúl Músipova.
Tarıf baǵasyn ósýi turǵyndarǵa salmaq salary anyq. Sol úshin ortaq esepteý qurylǵylaryn ornatý tıimdi. Nátıjesinde baǵa birden 30% tómendeıdi. Sondaı-aq esik, terezelerdi jylýdy ustaıtyndaı etip qaptaý, bólme temperatýrasyn rettep otyrý jylý qajettiligin azaıtady.
Eske salsaq, buǵan deıin Qazaqstan qalalarynda jylý baǵasy qansha turatynyn jazǵanbyz.