OSK 134 sheteldik baıqaýshyny akkredıttedi

ASTANA. QazAqparat – Búgin QR Ortalyq salaý komıssııasynyń otyrysynda 20 qarashada ótetin kezekten tys prezıdent saılaýyna 134 halyqaralyq baıqaýshy akkredıtteldi, dep habarlaıdy QazAqparat tilshisi.

Otyrysta osy másele boıynsha sóz sóılegen OSK hatshysy Muhtar Ermannyń dereginshe, 2022 jylǵy 22 qyrkúıekte kezekten tys prezıdent saılaýyn halyqaralyq baıqaý ınstıtýty ashylǵannan beri 6 halyqaralyq uıym men 8 shet memleketten 139 baıqaýshy akkredıtatsııadan ótken.

«2022 jylǵy 1-7 qarasha aralyǵynda Ortalyq saılaý komısssııasyna Syrtqy ister mınıstrliginen 4 halyqaralyq uıym men 14 shet memleketten 134 baıqaýshyny akkredıtatsııadan ótkizý úshin usynys tústi. 4 halyqaralyq uıymnan 110 baıqaýshy akkredıtatsııadan ótkizýge usynyldy. Olardyń ishinde, TMD-dan - 55, TMD-ǵa qatysýshy memleketterdiń Parlamentaralyq assambleıasynan - 34, ShYU baıqaýshylar mıssııasynan - 19, Túrki memleketteri uıymynan 2 baıqaýshy bar. 14 shet memleketten akkredıtatsııadan ótkizý úshin 24 kandıdatýra usynylyp otyr. Atap aıtsaq, Irak, Italııa, Latvııa, Ózbekstan Serbııa, Fınlıandııa Ulybrıtanııadan - 2 baıqaýshydan, Armenııa, Qyrǵyzstan, Lıtva, Polsha, Taıland jáne Majarstannan 1 baıqaýshydan, Reseı Federatsııasynan - 4 baıqaýshy», - dedi Muhtar Erman.

Osydan keıin Ortalyq saılaý komıssııasy tıisti qaýly jobasyn qabyldady. Sonymen 2022 jylǵy 8 qarashadaǵy jaǵdaı boıynsha halyqaralyq uıymdar men shet memleketterden akkredıttelgen baıqaýshylar sany 271 adamǵa jetti.