Ortalyq Azııa óner qaıratkerleri «Dostyq» ordenimen marapattaldy
ASTANA. KAZINFORM — Memleket basshysy Qasym-Jomart Toqaevtyń tapsyrmasyna sáıkes, Vıtse-Prezıdent Erlan Qarın Aqordada Ortalyq Azııa elderiniń birqatar mádenıet jáne óner qaıratkerlerine memlekettik nagradalardy saltanatty túrde tabystady. Bul týraly Aqorda málim etti.
Atap aıtqanda, II dárejeli «Dostyq» ordenimen halyqtar arasyndaǵy dostyqty nyǵaıtýǵa jáne mádenı baılanystardy damytýǵa qosqan eleýli úlesi úshin tanymal ánshiler Mırbek Atabekov, Parahat Amandýrdyev, Sevara Nazarhan, sýretshi-restavrator Taalaıbek Ýsýbalıev, akter Batyr Charyev, belgili dırıjer Kamolıddın Ýrınbaev marapattaldy.
Erlan Qarın óńir halyqtary arasyndaǵy dostyq pen ózara túsinistikti nyǵaıtýda nagrada ıeleriniń róli aıryqsha ekenin atap ótti.
— Ónerde shekara joq. Sizder óz shyǵarmashylyqtaryńyz arqyly halyqtar arasyn jaqyndatyp, jas urpaqtyń kórshiles elderdiń mádenıeti men dástúrin tereńirek túsinýine yqpal etip kelesizder, — dedi Erlan Qarın.
Vıtse-Prezıdent marapat ıelerin quttyqtap, shyǵarmashylyq tabys tiledi.
Buǵan deıin Erlan Qarın Prezıdent Joldaýyndaǵy bastamalardy zańnama turǵysynda qoldaýǵa basymdyq beretinin jazdyq.
