Órt qaýipsizdigi salasynda qylmys órship tur

ASTANA. QazAqparat – Osy jyldyń qańtar-aqpanynda elimizde órt qaýipsizdigi salasynda 47 qylmystyq quqyq buzýshylyq tirkeldi. Bul 2022 jyldyń eki aıyndaǵy kórsetkishten 17,5 paıyzǵa kóp, dep habarlaıdy QazAqparat tilshisi.

Finprom.kz portalynyń málimetinshe, 2022 jyldyń 12 aıynda respýblıka aýmaǵynda mundaı 54 quqyq buzýshylyq tirkelip, jyl ishinde 23,9 paıyzǵa kemigen.

Al bıyl sektordaǵy qylmystardyń basym bóligi Soltústik Qazaqstan oblysyna tıesili - 6 jaǵdaı.

Sonymen qatar bul kórsetkish Aqtóbe oblysy men Astana qalasynda da (5 jaǵdaıdan) joǵary.

Odan keıingi oryndarda Shymkent qalasy men Jetisý oblysy (4 jaǵdaıdan) tur.

Eki aıdyń ishindegi barlyq quqyq buzýshylyqtyń jartysy osy 5 óńirde bolǵan.

Jalpy, quqyq buzýshylyqtar elimizdiń 20 óńiriniń 17-sinde tirkelgen. Al Abaı, Qostanaı jáne Ulytaý oblystarynda bir de bir mundaı fakti tirkelgen joq.

Sektordaǵy ákimshilik quqyq buzýshylyqtarǵa keler bolsaq, 2022 jyldyń qańtar-jeltoqsan aılarynyń qorytyndysynda órt qaýipsizdigi erejesin buzýǵa qatysty 24,4 myń derek tirkelgen.

Bul bir jyl burynǵy kórsetkishten 26,2 paıyzǵa kóp. Munan bólek, kóliktegi órt qaýipsizdigi erejesin saqtamaýdyń 1,9 myń oqıǵasy oryn alǵan.

565 oqıǵa atmosfera aýasyn qorǵaý jáne qaldyqtardy qoımalaý nemese jaǵý kezindegi órt qaýipsizdigi jónindegi talaptardy oryndamaýǵa qatysty.

Sonymen qatar 525 oqıǵa ormandarda órt qaýipsizdigi talaptary men sanıtarlyq erejelerdi buzýǵa baılanysty tirkelgen.