Ormanshylarǵa haı-tek stılinde jańa úıler salynady
ASTANA. KAZINFORM —Shalǵaıda turatyn ormanshylarǵa jańa tıptik úlgidegi úıler salynady. Alǵashqysy Almaty oblysy Sharyn ulttyq parkiniń aýmaǵynda boı kóterdi.
Ormanshylar men qoryqshylarǵa arnalǵan kardonda bar jaǵdaı jasalǵan. Jatyn orny, ashanasy, dárethanasy, jyly sýy bolady. Ekinshi bóliginde týrıster aıaldaıtyndaı oryn qarastyrylǵan.
Yqsham ári jaıly «haıtek» stılindegi osy baspananyń úlgisin osy mekeme qyzmetkeri Qutlyqjan Júnisov syzǵan. Bul joba kópshilikke unap mınıstrlik bekitip, endi búkil Qazaqstandaǵy orman sharýashylyqtarynda osyndaı beketter salynbaq.
— Ormanshylar ormanda, aýyl, qaladan shalǵaıda turady. Sondyqtan olardyń ormanda turý jaǵdaılaryn jaqsartý maqsatynda osyndaı tapsyrma berilgen bolatyn. Biz osy kordondy soǵan sáıkestendirip jasap, ony komıtet pen mınıstrlik qoldap, pılottyq joba retinde júzege asyryldy. Endi tutas Qazaqstanǵa osy tıptegi qyzmettik úı retinde salýǵa tapsyrma berildi, — deıdi Sharyn memlekettik ulttyq tabıǵı parki dırektorynyń orynbasary Qutlyqjan Júnisov.
Aıta keteıik, sońǵy jyldary elimizdegi orman sharýashylyqtarynyń materıaldyq-tehnıkalyq bazasy jańaryp keledi. Keshege deıin ormanshylar eski Nıva, Ýaz kólikterin minse, qazir tabıǵat qorǵaýshylar zamanaýı pıkaptarǵa aýysqan. Órt sóndirý tehnıkalarynyń da yqsham ári yńǵaıly túrlerin alǵan.
Jibek Joly telearnasynyń «ECO aýdıt» jobasy Almatydaǵy orman sharýashylyǵy men onda ósetin aǵashtardyń san alýandyǵyn kórsetken edi. Sońǵy bes jylda Almaty oblysynda alma, órik, jıde, qaraǵash, qaıyń, shyrsha, sekseýil sekildi aǵashtardyń 46 mln kósheti egilgen. Sonyń 70 paıyzy tamyr jaıyp, ósip-óngen.
