Orazbek Asylqulov alǵash ret Azııa chempıony atandy

ASTANA. KAZINFORM – Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynyń fınalynda el quramasynan Orazbek Asylqulov (60 keli) synǵa tústi.  

Otandasymyz fınalda úndistandyq Sachın Sachınpen qolǵap túıistirdi. Orazbek alǵashqy mınýttan qarsylasyna qysym jasap, sońǵy raýndta jeńisti julyp aldy. Qorytyndy esep – 3:2.

Buǵan deıin qazaqstandyq boksshy irikteý kezeńinde fılıppındik Pol Djýlıfer Baskondy jeńise, shırek fınalda japonııalyq Shýnsýke Kıtamoto bas tartýyna baılanysty jarystyń kelesi satysyna ótti. Jartylaı fınalda ol ózbekstandyq Abdýrahmon Mahmýdjonovty qapy qaldyryp ketti.

Orazbek Asylqulov IBA nusqasy boıynsha 2025 jyly álem chempıony ataǵyn jeńip aldy. 

Endi el quramasynan 5-jupta Tórehan Sabyrhan (70 keli) ıordanııalyq Zeıad Ishaısh, 6-jupta Sabyrjan Aqqalyqov (75 keli) ózbekstandyq Javohır Abdýrahımov, 8-jupta Nurbek Oralbaı (85 keli) ózbekstandyq Jasýrbek ıÝldoshevpen sharshy alańǵa shyǵady. Sondaı-aq 10-jupta Aıbek Oralbaı (90 keliden joǵary) qytaılyq Danabek Baıkenjemen kezdesedi.

Aıta ketsek, 9 sáýirde elimizdiń áıelder quramasy qurlyqtyq dodada 2 altyn, 1 kúmis, 2 qola júldege qol jetkizdi.

Bedeldi básekede Nadejda Rıabets (80 keli), Dına Islambekova (80 keliden joǵary) Azııa chempıony atansa, Baqyt Seıdish (70 keli) kúmis júldeger boldy. Sondaı-aq Áıgerim Sáttibaeva (48 keli), Valentına Halzova (70 keli) úzdik úshtikti túıindedi.

Elimizdiń áıelder quramasy medaldar sany jóninen ekinshi orynǵa turaqtady. Kósh basynda turǵan Úndistannyń 4 altyn, 2 kúmis, 4 qola medali bar.