Oralda búgin 300-deı tal-terek otyrǵyzyldy
Budan birer jyl buryn Oraldan Saratovqa qaraı shyǵar jol qaıtadan salynyp, qara aǵashtar syrylyp tastalyp, aýrýhana jaǵy jalańashtanyp qalǵan bolatyn. Mine, búgin osy aýmaqqa aǵash otyrǵyzý isine kent ardagerleri men turǵyndar, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ustazdary men stýdentteri atsalysty.
«Naýryz merekesi kelip, tirshilik bitken oıanyp, jańa jylymyz bastalyp jatyr. «Atańnan mal qalǵansha, tal qalsyn» degen ulaǵatty sóz bar. Osy ıgi dástúrdi bıyl da jalǵastyryp, Oral qalasynyń birneshe jerinde aǵash otyrǵyzýdamyz. Mundaı jumystar oblys aýdandarynda da uıymdastyrylady. Árıne, aǵash otyrǵyzý óz aldyna, ony kútip-baptaý kerek. Sondyqtan bul jumysty aldymen sol mańdaǵy mekeme-uıymǵa tapsyramyz. Mysaly, búgingi shyrsha men qaıyńǵa oblystyq kópbeıindi balalar aýrýhanasy kóz bolýy tıis. Ýaqtyly sýarylmasa, qaralmasa, aǵash qýrap qalady. Turǵyndar da budan shet qalmaı, qamqor bolsa, jerimiz jasyl jelekpen kómkerileri anyq. Qalada jańa shaǵynaýdandar paıda bolyp, tez ósýde. Sonyń bárinde de tal-terek otyrǵyzý josparda bar. Eń bastysy, Ulys oń bolsyn, aq mol bolsyn!», dedi «QazAqparat» tilshisine Altaı Kólginov.
«Oblystyq kópbeıindi balalar aýrýhanasynyń aldyna tal-terektiń otyrǵyzylýy balalar úshin, óńirimizdiń bolashaǵy úshin atqarylyp jatqan ıgi is dep bilemiz. Buǵan ardagerlerden bastap oblys, qala ákimderiniń kelip qatysýy bılik pen halyqtyń arasyndaǵy birlikti bildiredi. Jas shybyqtardyń terek bolyp ósip ketýi úshin úlken kútim, qamqorlyq kerek. Jáńgir han atyndaǵy BQATÝ bar, balalar aýrýhanasy bar jáne «Jaıyq taza qala» JShS muny qaraýsyz qaldyrmaıdy dep senemiz», dedi tarıhshy-ustaz Saılaý Súleımenov.
Aıta keteıik, Oral qalasy ákimdiginen túsken málimetke qaraǵanda, shaharda búgin 300 túp tal-terek otyrǵyzyldy.
