Oralda bopsalaýmen aınalysqan kolledj stýdentteri ustaldy

ORAL. KAZINFORM — Batys Qazaqstan oblysy polıtsııa departamentiniń uıymdasqan qylmyspen kúres basqarmasy qyzmetkerleri Oralda jergilikti turǵynnan aqsha bopsalady degen kúdikpen jastar tobyn ustady.

BQO polıtsııa departamentiniń baspasóz qyzmetinen túsken aldyn ala málimetke qaraǵanda, jábirlenýshi jigit áleýmettik jelide tanysýǵa arnalǵan arna arqyly bir qyzben sóılesken. 

Hat almasý kezinde qyz ony óz úıine kezdesýge shaqyrǵan. Kórsetilgen mekenjaıǵa kelgen kezde páterge úsh belgisiz jigit basa-kóktep kirip, jábirlenýshini syrtqa shyǵaryp, ózderin qyzdyń aǵasy retinde tanystyryp, qorqytyp aqsha talap etken. 

- Qoryqqan jábirlenýshi telefonyn kúdiktilerdiń birine bergen, ol bank qosymshasy arqyly óziniń bank shotyna aqsha aýdaryp alǵan. Jedel izdestirý is-sharalary barysynda barlyq qatysýshylar anyqtalyp, ustaldy. Qazirgi tańda bopsalaý faktisi boıynsha qylmystyq is qozǵaldy. Bes kúdiktiniń tórteýi — Oral qalasyndaǵy kolledj stýdentteri, olardyń biri — sol kezdesýge shaqyrǵan qyz. Qazirgi kezde oqıǵanyń mán-jaıy, keltirilgen zalal kólemi anyqtalý ústinde, - dep habarlady vedomstvodan.

Eske sala keteıik, budan buryn Batys Qazaqstanda jol apatynan eki oqýshynyń kóz jumǵanyn jazǵan bolatynbyz.