Oralda «Ashyq ákimdik» qabyldaýyna 300-den astam adam keldi
Úsh saǵat ishinde 311 adam kelip, barlyǵy 34 oblystyq mekeme-uıymnyń, oǵan qosa Oral qalasy ákimdigi bólimderiniń basshylary men qyzmetkerlerinen keńes aldy. Sonyń ishinde 58-i oblystyq jer qatynastary, 43-i energetıka jáne turǵyn úı-kommýnaldyq sharýashylyq, 20-sy jumyspen qamtýdy úılestirý jáne áleýmettik baǵdarlamalar, 16-sy densaýlyq saqtaý, 13-i qurylys pen jolaýshylar kóligi jáne avtomobıl joldary basqarmasyna jolyqty.
Oral qalasynyń ákimi Narıman Tóreǵalıevtiń aıtýynsha, adamdardyń bári birdeı jumys kúnderi mekemelerge baryp, júre almaıtyndyqtan, senbi kúni tańdalyp alyndy. «Olardyń basym kópshiligin turǵyn úı men jer kezegi máseleleri tolǵandyrady. Mysaly, Oralda qazir turǵyn úı kezeginde 17 myńnan astam adam tirkelse, jer telimin alýǵa turǵandar sany 70 myńnan asyp ketti. Men olarǵa ótken jyly qabyldanǵan «Nurly jer» baǵdarlamasynyń negizgi baǵyttaryn túsindirdim. Bıyl qalada 7 kóp qabatty turǵyn úı qurylysy bastaldy. Aldaǵy ýaqytta taǵy tórt sondaı úı salynbaqshy. Sonymen qatar ınfraqurylym bolmaǵan jaǵdaıda jeke turǵyn úı salý úshin jer telimderi berilmeıdi. Qalanyń Derkól, Juldyz, Zachagan syndy bólikterinde barlyq qajetti kommýnıkatsııa tartylǵannan keıin ǵana jer telimderi berile bastaıdy», dedi shahar basshysy.
Oblystyq ishki saıasat basqarmasynyń basshysy Baqytjan Narymbetovtiń sózine qaraǵanda, «Ashyq ákimdik» sharasy barlyq jergilikti atqarýshy organdardyń ashyqtyǵyn qamtamasyz etý baǵytynda qolǵa alyndy. Aldaǵy ýaqytta mundaı ashyq esik kúnderin turaqty uıymdastyrý kózdelýde.
Aıta keteıik, barlyǵy 172 memlekettik qyzmet túri bolsa, 2016 jyly BQO-da jergilikti atqarýshy organdar 2,2 mln. memlekettik qyzmet kórsetken. Sonyń ishinde 281 myńy elektrondy túrde, 58 myńy halyqqa qyzmet kórsetý ortalyǵy arqyly kórsetilgen.
