Oralda 10 jasar balany ıt qaýyp aldy
ORAL. KAZINFORM – Oralda ıt qaýyp alǵan 10 jasar bala zardap shekti.
BQO polıtsııa departamentiniń baspasóz qyzmetinen málim etkenindeı, oqıǵa 21 mamyr kúni «Jańa orda» shaǵynaýdany 2-mekenjaı mańynda boldy. Shamamen saǵat 19.50-de Oral qalasy polıtsııa basqarmasynyń kezekshi bólimine habar túsken.
– 2015 jylǵy ul balany ıt qaýyp alǵan. Oqıǵa ornyna polıtsııa qyzmetkerleri jiberildi. Balanyń ákesi shaǵym túsirýden bas tartty. Atalǵan derek boıynsha buralqy ıtterge qatysty shara qoldaný úshin Oral qalalyq veterınarııalyq stantsııasyna hat jiberildi, - dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, balanyń jalpy jaǵdaıy qanaǵattanarlyq. Qazirgi tańda qajetti medıtsınalyq kómek kórsetilip, baqylaýǵa alyndy.
Oral qalalyq veterınarııalyq stantsııasynyń dırektory Erlan Işanovtyń aıtýynsha, búgin oqıǵa bolǵan jerden eki ıt aýlandy.
– Itter Jáńgir han atyndaǵy Batys Qazaqstan agrarlyq-tehnıkalyq ýnıversıteti janyndaǵy «Járdem-Vet» oqý-ǵylymı-óndiristik ortalyǵyna 10 kúnge karantınge qoıyldy. Baqylaýda ustalyp, sodan keıin tıisti shara qabyldanady, - dedi E.Işanov.
Eske sala keteıik, budan buryn Oralda mekteptiń janynda qańǵybas ıtterdiń órip júrýine baılanysty vetstantsııanyń qandaı jumystardy qolǵa alyp jatqanyn jazǵan bolatynbyz.