Oral qalasynda emhanada órt shyqty
ORAL. KAZINFORM — Oralda BQO densaýlyq saqtaý basqarmasyna qarasty № 1 qalalyq emhana órtendi.
BQO TJ departamentiniń baspasóz qyzmetinen málim etkenindeı, oqıǵa 13 sáýir kúni boldy. Saǵat 14.36-da N.Nazarbaev dańǵyly 206A-mekenjaıynda ornalasqan emhana ǵımaraty janǵany jóninde habar túsken.
- Birinshi qabattaǵy dálizde 15 sharshy metr aýmaq otqa orandy. Zardap shekkender joq. Aldyn ala málimet boıynsha ot elektr symdarynyń qysqa tuıyqtalýynan shyqqan. «Tilsiz jaý» saǵat 14.47-de oqshaýlanyp, 15.07-de aýyzdyqtaldy. Órtti sóndirý úshin 35 adam, 15 tehnıka bardy.
Qazirgi kezde oqıǵanyń jaı-japsary, keltirilgen shyǵyn anyqtalý ústinde, - dep habarlady vedomstvodan.
Emhananyń órtenýine baılanysty turǵyndar áleýmettik jelide alańdaýshylyq bildirýde.
BQO densaýlyq saqtaý basqarmasynyń baspasóz qyzmeti ǵımarat foıesinde (tirkeý orny) órt bolǵanyn, soǵan oraı tergeý amaldary júrgizilip jatqanyn jetkizdi.
Basqarmanyń málimetine qaraǵanda, emhana 14 sáýir kúni kelýshilerdi qabyldaıdy.
Eske sala keteıik, budan buryn Oralda vagondar jóndeletin ǵımarat órtengenin jazǵan bolatynbyz.