Ońtústikten Soltústikke qonys aýdarýshylarǵa qoldaý kóp
TÚRKІSTAN. KAZINFORM - Elimizdiń halyq tyǵyz ornalasqan ońtústik óńirlerinen soltústikke qonys aýdarǵan azamattar sany jyl sanap artyp keledi. Buǵan sebep - memleket tarapynan barlyq qolaıly jaǵdaı jasalyp, turaqty jumys oryndarynyń ashylýy.
Kóship barǵan azamattardyń jaı-kúıimen tanysý úshin túrkistandyq arnaıy jumysshy toby teriskeıge bardy. Olar aldymen Soltústik Qazaqstan oblysy, Aıyrtaý aýdanynda aǵa dáriger bolyp jumys isteıtin Aıan Erhanulymen kezdesti. Túrkistan oblysy, Kentaý qalasynyń týmasy teriskeıge osydan 5 jyl buryn qonys aýdarǵan. Túrkistan qalasyndaǵy Q.A.ıAsaýı atyndaǵy HQTÝ túlegi 5 jyl ishinde aýa-raıyna ábden úırengenin aıtyp, ózge jerlesterin de qonys aýdarýǵa shaqyrdy.
Odan soń jumysshy top óńirdegi iri kásiporyndardyń biri - «Elevator Taıynsha» JShS-da boldy. Atalǵan nysannyń dırektory - Túrkistan oblysy Túlkibas aýdanynda kindik qany tamǵan Shynazbek Balqybek. Qazir kásiporyn teriskeı turǵyndary men kúngeı óńirden qonys aýdarǵan azamattarǵa qoldaý bildirip, olardyń eńbek etýine múmkindik jasap otyr. Búgingi tańda ońtústik óńirden kóshken 30-dan astam azamat kásiporynnan turaqty jumys tapqan.
Jumysshy toptyń kelesi sapary Aqqaıyń aýdanynyń ortalyǵy Smırnovo aýyly boldy. Onda saryaǵashtyq Ýsmanovtar januıasy «Shymkent» atty kafe ashyp, jeke kásibin dóńgeletip otyr. Olar bul óńirge 2017 jyly qonys aýdarǵan. Jeke kásibin ashyp, nesibesin kórip otyrǵandar qatarynda Qasym Amangeldın de bar. Shymkenttik jigit búginde Petropavl qalasynyń qaq ortasynan er jigitterge arnalǵan shashtaraz ashyp, soltústikke ábden beıimdelip úlgergen.
Aıta keteıik, Qazaqstan Eńbek jáne halyqty áleýmettik qorǵaý mınıstrligi 2024 jylǵa respýblıka boıynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblys belgilengen bolatyn. Olardyń qatarynda Soltústik Qazaqstan oblysy (2 702 adam), Pavlodar oblysy (2 603 adam), Qostanaı oblysy (950 adam), Shyǵys Qazaqstan oblysy (372 adam), Abaı oblysy (255 adam), Ulytaý oblysy (132 adam), Qaraǵandy oblysy (36 adam) bar.
Bólingen kvota negizinde osy jyldyń 8 aıynda Túrkistan oblysynan 288 otbasydan 1 116 adam qonys aýdardy. Naqty kórsetsek, Shyǵys Qazaqstan oblysyna 18 otbasy (71 adam), Qostanaı oblysyna 18 otbasy (71 adam), Pavlodar oblysyna 127 otbasy (592 adam), Soltústik Qazaqstan oblysy 110 otbasy (318 adam), Qaraǵandy oblysyna 2 otbasy (11 adam), Abaı oblysyna 8 otbasy (23 adam), Ulytaý oblysyna 5 otbasy (30 adam).
Jalpy elimiz boıynsha 3 494 qonys aýdarǵandardyń 32%-y Túrkistan oblysynyń úlesinde. Olardyń ishinde eńbekke jaramdy 538 adamnyń 304-i jumysqa ornalasqan. 2015 jyldan beri jumys kúshi az Soltústik óńirlerine halqy tyǵyz ornalasqan Ońtústik aımaqtardan azamattardy kóshirý jumystary nátıjesinde búgingi kúnge deıin 14 874 adam nemese 3 358 otbasy qonys aýdarǵan.
Memleket Soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úı jaldaýǵa qarjy beredi. Budan bólek, bılik olardy qysqa ýaqytqa kásibı oqýǵa jiberip, jumysqa turǵyzýy, jeńildikpen baspana alýǵa kómektesýi tıis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsıdııa beriledi.
