Ońtústik óńirlerdegi sý qoımalarynyń deńgeıi tómendedi — mınıstrlik
ASTANA. KAZINFORM — Ońtústik óńirlerde ylǵaldy kóp qajet etetin daqyldardyń egis alqaptaryn shekteý kerek. Bul týraly búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov málim etti.
— Vegetatsııalyq kezeńge daıyndyq sheńberindegi ishki is-sharalar aıasynda sýarý kanaldary men gıdrotehnıkalyq qurylysjaılarda jóndeý-qalpyna keltirý jumystary júrip jatyr, ońtústik oblystardaǵy sý qoımalary toltyrý rejıminde jumys istep tur. 2026 jylǵy 18 aqpandaǵy jaǵdaı boıynsha ońtústik óńirlerdegi sý qoımalarynda 23,4 mlrd tekshe metr sý jınaldy, bul byltyrdyń osy kezeńimen salystyrǵanda 759 mln tekshe metrge az. Aıta ketý kerek, 2025 jylǵy 1 jeltoqsanda atalǵan sý qoımalarynda 17,7 mlrd tekshe metr sý jınalǵan bolatyn, bul 2024 jyldyń sol kezeńimen salystyrǵanda 2,3 mlrd tekshe metrge az boldy. Qabyldanǵan jedel sharalardyń nátıjesinde sońǵy 2 aıda sý jınaý dınamıkasy arttyp, qosymsha 1,5 mlrd tekshe metr ósim qamtamasyz etildi. Erekshe alańdaýshylyq týǵyzatyny — negizinen ishki sý kózderi esebinen tolatyn sý qoımalarynyń tolý deńgeıi, — dedi Nurjan Nurjigitov.
Osy oraıda mınıstr Túrkistan oblysyndaǵy Bógen sý qoımasynda 278 mln tekshe metr sý jınalǵanyn (jobalyq kólemi — 370 mln.m3), bul ótken jylǵy kórsetkishten 46 mln tekshe metrge az ekenin aıtty. Sondaı-aq Badam sý qoımasynyń tolýy 32 mln tekshe metr boldy, bul 2025 jyldyń osy kezeńimen salystyrǵanda 18 mln tekshe metrge kem. Osyǵan uqsas jaǵdaı Jambyl oblysyndaǵy Teris-Aşybulaq, Qaraqońyz, Qaqpatas, Jartas jáne Búrkitti sý qoımalarynda da qalyptasyp otyr.
— Osyǵan baılanysty byltyr atalǵan oblystarda vegetatsııalyq kezeń kúrdeli jaǵdaıda ótkenin eskere otyryp, eki oblystyń ákimdikterine ylǵaldy kóp qajet etetin aýyl sharýashylyǵy daqyldarynyń egis alqaptaryn shekteý boıynsha sharalar qabyldaý qajet. Vegetatsııalyq kezeńge daıyndyq jáne táýekelderdi barynsha azaıtý maqsatynda 2025 jyly «Qazsýshar» fılıaldary 1840 km sýarý kanaldaryn mehanıkalandyrylǵan tásilmen tazalady, 680 km sýarý jelilerin rekonstrýktsııalady jáne 375 gıdrotehnıkalyq qurylysjaıdy jóndedi, — dedi vedomstvo basshysy.
Budan buryn habarlanǵandaı, búgin Úkimet otyrysynda bıyl jalpy egis alańy shamamen 23,8 mln gektar bolatyny aıtyldy.