Óńirlerdiń óz boryshyn óteýde jaýapkershiligi artady
ASTANA. KAZINFORM — Qazaqstanda óńirlik deńgeıde memlekettik boryshty basqarý tıimdiligin arttyrý boıynsha sharalar qabyldandy. Qajetti jumysty Ulttyq ekonomıka mınıstrligi Joǵary aýdıtorlyq palatanyń nusqamasy boıynsha júrgizdi.
Buryn júrgizilgen memlekettik aýdıt sheńberinde osy salada birqatar kemshilik anyqtalǵan bolatyn.
— «Jumyspen qamtý jol kartasy» aıasynda jergilikti atqarýshy organdardyń basqa kredıtorlar aldyndaǵy qaryzyn óteýge jumsalǵan shyǵys jalpy sıpattaǵy transfertterdi esepteý kezinde eskerilgen. Bul ortalyqqa boryshtyq júkteme túsiredi. Jergilikti jerde qaryz alý lımıtteri (kiristerdiń 10%-ynan aspaıtyn) keı jaǵdaılarda saqtalmaıdy. Al jergilikti atqarýshy organdardyń lımıtti saqtamaǵany úshin jaýaptylyǵy kózdelmegen. Jalpy qaryzdy basqarý ártúrli ádispen júzege asyrylyp kelgen, — delingen Joǵary aýdıtorlyq palata habarlamasynda.
Osyǵan baılanysty Joǵary aýdıtorlyq palata UEM-ge normatıvtik-quqyqtyq bazaǵa qajetti ózgerister engizý arqyly anyqtalǵan olqylyqtardy joıýdy tapsyrdy.
Nátıjesinde jańa Bıýdjet kodeksine (2025 jylǵy 15 naýryzda qol qoıylǵan) birqatar tıisti túzetý engizildi:
endi jergilikti qaryzdardy óteýge arnalǵan shyǵystar ortalyq deńgeıde qalyptasatyn óńirlerdiń jalpy shyǵyndarynyń boljamyna (bilim berý, medıtsına, ınfraqurylym jáne t. b.) engizilmeıdi. Bul óńirlerge olardy óteý boıynsha basym jaýaptylyq bekitedi;
jergilikti atqarýshy organdar boryshynyń lımıtteri Prezıdent jarlyqtarymen bekitiletin nysanaly baǵdarlar eskerile otyryp aıqyndalady;
lımıtterdiń saqtalmaǵany úshin oblystardyń, respýblıkalyq mańyzy bar qalalardyń jáne astananyń ákimderi tikeleı jaýapty bolady.
Sonymen qatar tómen turǵan bıýdjettiń salyqtyq jáne salyqtyq emes kiristerin asyra oryndaý somalary endi toqsanyna bir ret olardyń boryshtyq mindettemelerin óteýge jáne joǵary turǵan jergilikti bıýdjetterdiń basym áleýmettik shyǵysyn qarjylandyrýǵa baǵyttalady.
— Bul tásil bıýdjetterdiń derbestik qaǵıdattaryn nyǵaıtýǵa, boryshtyq júktemeni qysqartýǵa, qarjylyq tártipti arttyrýǵa jáne bıýdjet qarajatyn tıimdirek bólýge múmkindik beredi, — delingen habarlamada.
Aıta ketelik respýblıkalyq bıýdjetten bólingen 207 mln teńge tıimsiz jumsalǵany týraly jazǵan edik.