Óleńin aıalaǵan ór aqyn edi...
Kúni keshe ómirden ozǵan qazaqtyń ataqty aqyn qyzy Farıza Ońǵarsynova týraly aqyn, «Ádebıet portalynyń» redaktory Baýyrjan Qaraǵyzuly QazAqparatqa bergen suhbatynda osylaı dedi.
«Bir Allanyń adam balasyna qulpyrta bergen tańdaý erkinde óz taǵdyryn ózderi tamyljyta tańdaı qaqtyra jazatyn tek has aqyndar. Qazaq poezııa keńistigindegi Farıza Ońǵarsynova - has aqyn.
Ol Óleńnen ózin izdedi. Óleń onyń jan syrlasy, jaqyn muńdasy boldy. Ómir zańdylyǵyna syımaǵan oı tolqyny Óleń bolyp arnasynan asyp-tasyp jatty. Qudaıdyń kudiretimen qaýyzynda móldir sezim men duǵaly oıdyń beınesinde kóringen óner týyndysy uly ýaqyt janarynda ǵasyrlar boıy gaýhar tastaı jarqyrap turady. Ol muńdy júrektegi máńgilik mahabbattyń "tilsiz tilinde" sóıledi», - deıdi B. Qaraǵyzuly.
Onyń aıtýynsha, aqynsyz qoǵam arsyzdyqqa ushyraıdy, jaltaq jaǵympaz qoǵamǵa aınalady. Al, qoǵamsyz aqyn bolmaıdy. Aqyn týǵan elin, tilin, dilin, júregimen súıedi. Qara orman halqy úshin janyn qııady. Ol bizdiń qarııa tarıhymyzdyń qandy paraqtarynda kóz jasymyzben jazylǵan bolatyn.
«Endi, mine, 75 jasyna qaraǵan shaǵynda aıaýly aqyn apamyz - qoǵam qaıratkeri, halqynyń ardaqtysy Farıza Ońǵarsynova da bul ómirden ozdy. Ol ár ýaqytta ımandy qadamymen el aldynda, gazet-jýrnaldaryń basynda, QR Parlament Májilisinde qyzmet etken jyldarynda ultyna atanyń qanymen, ananyń sútimen sińirgen o bastaǵy adal prıntsıpterinen aınymaı qyzmet etken edi. Farıza poezııasynyń jalǵannan máńgilikke ulasqan mahabbat jyrlarymen qosa qazaqtyń qolqasyna ý bolyp tunyp, arqasyna aıazdaı batyp, muz bolyp qatqan qaıǵysyn qalamynyń ushynda sher qylyp oıatty. Janyńyz jannatta bolsyn, aıaýly aqyn apa!», - deıdi B. Qaraǵyzuly.
QazAqparat agenttigi Baýyrjan Qaraǵyzulynyń Farıza Ońǵarsynovaǵa arnaǵan óleńin berýdi jón kórip otyr.
Ne degen aýyr tún edi?!
Ne degen aýyr kún edi?!
Qaıǵy shekken qazaqtyń,
Qars aıyryldy júregi.
Qara túnniń kózinen,
Qap-qara bolyp qan aqty!
Qara aspannyń ózinen,
Qap-qara bolyp tań atty!
Abyzdary búgilip,
Іshteı janyn jylatty.
Batyrlary úgilip,
Kózinen muń qulatty.
Teris ashty túndigin,
Qaıǵy jasyn bulatty.
Barlyq aqyn bir-birin,
Kóńil aıtyp jubatty.
Jel jylady dalada,
El jylady qalada.
Qalyń qazaq qaıǵyrdy,
Has Aqynnan aıyryldy.
Farızadan aıyryldy!
Kúrsinisinen kún sónip,
Altyn qanaty qaıyryldy!
Aqıqattyń kózi edi,
Alty alashtyń Sózi edi.
Aıbary edi elimniń,
Aıbyny edi jerimniń...
Dúnıeden kóshkeni,
Qandaı aýyr aqynnyń.
Kótere almaı basymdy,
Qaıǵy jutyp otyrmyn...