Oqýshy óz betimen olımpıadaǵa bara almaıdy
ASTANA. 27 aqpan. QazAqparat - Bilim jáne ǵylym mınıstrligi daryndy balalardyń ata-analaryna mynadaı keńes berdi: oza shapqan, bilimdi, bilgir oqýshylar halyqaralyq olımpıadalardy óz betimen tańdamaýy tıis,
dep jazdy «Aıqyn» gazeti búgingi sanynda.
«Osyǵan qatysty aıtarymyz: ótken jyly keleńsiz jaǵdaı oryn aldy. 40 adam óz betimen halyqaralyq olımpıadalarǵa qatysýǵa barǵan. Olar árıne, bul jerde mınıstrlik bekitken olımpıadalardyń tizbesi bar buıryqty qaramaǵan. Múmkin jergilikti jerlerdegi bilim uıymdary muny nazardan tys qaldyrǵan shyǵar. Keıin osyndaı halyqaralyq olımpıadaǵa qatysqan túlekter UBT-dan bosatý týraly ótinish berdi», - dep málim etti Bilim jáne ǵylym mınıstrliginiń «Daryn» respýblıkalyq ǵylymı-tájirıbelik ortalyǵynyń dırektory Sholpan Qırabaeva.
Ol mektep oqýshylaryna óz tańdaýy boıynsha olımpıadalarǵa qatysýǵa tyıym salynǵanyn eske saldy.
»Keshe ǵana onlaın rejıminde ınteraktıvti keńes ótti, osyǵan oraı basqarma basshylarynyń barlyǵyn jınadyq, mektep oqýshylaryna óz betimen túrli olımpıadalarǵa qatysýyna tyıym salynǵany aıtyldy», - dedi ol.
Sh. Qırabaeva olımpıadany óz betimen tańdaý men odan alǵan dıplom UBT-dan bosatýǵa kepildik bermeıtinin aıtty.
«Qazir keıbir jas túlekter belgili bir olımpıadaǵa qatysýy múmkin, jeńimpaz atansa, oǵan dıplom beriledi, sonymen bitti, biraq onyń eshqandaı kúshi joq, óıtkeni bizdiń mınıstrliktiń tizbesinde joq, al mundaı dıplomy bar oqýshy - grantqa da ilinbeıdi, ony UBT-dan bosatýǵa da esh múmkindik joq», - dedi «Daryn» respýblıkalyq ǵylymı-tájirıbelik ortalyǵynyń dırektory Sholpan Qırabaeva. Qırabaevanyń aıtýynsha, «Bilim týraly» zańǵa sáıkes, tizbesin Bilim jáne ǵylym mınıstrligi belgileıtin jalpy bilimdik pánder boıynsha halyqaralyq olımpıadalar men ǵylymı jobalar konkýrstarynyń sońǵy 3 jyldaǵy jeńimpazdary bilim granttaryn alýǵa konkýrsqa qatysqan kezde artyqshylyq quqyqqa ıe bolady.
«Sonymen birge, sońǵy 3 jylda halyqaralyq olımpıadalar men ǵylymı jobalar konkýrstarynyń jeńimpazdary, ústimizdegi jyldaǵy halyqaralyq olımpıadaǵa qatysýshylar da UBT tapsyrmaıdy. Balalar tabelderin, dıplomdaryn, sertıfıkattaryn arnaıy respýblıkalyq komıssııaǵa tapsyrady, mektepte 5 pán boıynsha qorytyndy emtıhandaryn tapsyrady, sosyn UBT-dan bosatylady», - dedi ortalyq basshysy.
|
|
|
|
|
