Oqýlyqtar 79 paıyz tsıfrlyq formatqa kóshirildi

ASTANA. QazAqparat – Mektep oqýlyqtarynyń 79 paıyzy tsıfrlyq formatqa kóshirildi. Bul týraly Úkimet otyrysynda Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.

«Memleket basshysynyń oqý protsesin tsıfrlandyrý aıasynda pánderdi oqytýdyń ınnovatsııalyq tásilderin engizý, qajet oqý materıaldaryn tsıfrlyq formatqa kóshirý tapsyrmasyna sáıkes, pedagogterge tsıfrlyq oqý materıaldaryn tıimdi paıdalanýdy, ınnovatsııalyq tásilderdi qoldanýdy úıretý, tsıfrlyq oqý materıaldaryn keńeıtý, mektepishilik jáne Ulttyq syrtqy baǵalaýdy tsıfrlyq formatqa kóshirý, sondaı-aq mektepterdi tehnıkalyq quraldarmen jáne joǵary jyldamdyqty ınternetpen qamtý mindetteri iske asyrylyp keledi», - dedi mınıstr.

Onyń atap ótýinshe, buǵan qajet talaptar men erejeler mınıstrliktiń 6 normatıvtik-quqyqtyq aktilerinde naqty bekitilgen. Atalǵan zańnamalarǵa sáıkes qazirgi tańda bilim júıesin tsıfrlandyrý jumystary keshendi ári júıeli túrde júrgizilýde.

«Oqý protsesin basqarýdy tsıfrlandyrý maqsatynda respýblıka boıynsha 7 myń mektepte elektrondyq jýrnaldar men kúndelikterdi júrgizý, baǵalaý, úı tapsyrmasyn berý, jospar qalyptastyrý jáne qashyqtan oqytý sııaqty negizgi qyzmetterdi qamtıtyn bilim berý platformalary engizildi. Sonymen qatar, bul platformalardyń oqýshylar men ustazdarǵa arnalǵan mobıldi qosymshalary, analıtıkalyq baqylaý taqtalary, mekteptegi as máziri jáne onlaın biliktilikti arttyrý kýrstary sekildi qosymsha qyzmetteri iske qosylǵan. Qazirgi tańda oqýlyqtardyń 79 paıyz tsıfrlyq formatqa kóshirilip, memlekettik saraptamadan ótti jáne oqýlyqtar tizimine kirdi», - dedi ol.