Jańa oqý jylyn úlken josparlarmen, úkili úmitpen bastap otyrmyz — mınıstr
ASTANA. KAZINFORM — Oqý-aǵartý mınıstri Ǵanı Beısembaev qazaqstandyqtardy jańa oqý jylynyń bastalýymen quttyqtady.
Ǵanı Beısembaev Instagram-daǵy paraqshasynda Bilim kúnimen quttyqtaýyn jetkizip, jańa oqý jylyn biz úlken josparlarmen, úkili úmitpen bastap otyrǵanyn aıtty.
— Qurmetti áriptester! Qadirli ustazdar, ata-analar men oqýshylar! Búgin Qazaqstannyń túkpir-túkpirindegi bilim ordalary óz esigin aıqara ashady. Jańa oqý jylyn biz úlken josparlarmen, úkili úmitpen bastap otyrmyz. Sizderdiń árqaısyńyz elimizdiń bolashaǵy úshin ólsheýsiz úles qosyp kelesizder. Bıylǵy oqý jyly oqýshylarymyz ben ustazdarymyzdy jańa bıikterdi baǵyndyrýǵa shabyttandyratyn jetistikter men jeńisterge toly bolsyn dep tileımin! Bilim kúni qutty bolsyn! — dep jazdy Beısembaev.
Aıta keteıik, búgin 360 myń bala mektep tabaldyryǵynan alǵash ret attaıdy.
Buǵan deıin habarlanǵandaı, Astanadaǵy 206 mekteptiń 77-si jeke menshik.