Oksford ýnıversıtetinde qazaq tili oqytylady
ASTANA. KAZINFORM – QR Syrtqy ister mınıstri Murat Nurtileý Ulybrıtanııa Syrtqy ister mınıstri Devıd Kemeronmen kezdesýinde Oksford ýnıversıtetinde qazaq tili kýrstaryn ashý týraly memorandýmǵa qol qoıylǵanyn málimdedi.
QR SІM basshysy atap ótkendeı, Qazaqstan men Ulybrıtanııa úshin ortaq qundylyqtardyń biri – adamı kapıtal. Sońǵy jyldary eki el arasyndaǵy bilim berý salasyndaǵy seriktestik belsendi damyp keledi.
«Brıtandyq ǵylym jáne bilim berý júıesi árqashan bizdiń stýdentter men ǵalymdarǵa tartymdylyǵymen erekshelenedi. Mysaly, bıyl Londonda Narhoz jáne Queen's ýnıversıtetteri arasynda seriktestik jáne qos dıplomdyq baǵdarlama boıynsha kelisimderge qol qoıyldy. Primus Capital jáne Ardingly kolledjderiniń ýaǵdalastyqtaryna sáıkes, Qazaqstanda eki halyqaralyq mektep ashý josparlary da bar. Búgin Oksford ýnıversıtetinde qazaq tili kýrstaryn ashý týraly memorandýmǵa qol qoıyldy, - dedi Murat Nurtileý.
Onyń aıtýynsha, brıtandyq Oksford jáne Manchester ýnıversıtetteriniń kitaphanalarynda, sondaı-aq Ulttyq mýzeıde qazaq halqynyń tarıhyna qatysty mańyzdy qoljazbalar men kitaptar tabylǵan. Bes ǵasyr buryn 1562 jyly brıtandyq dıplomat Entonı Djenkınsonnyń «Qazaqııa» kartasy jaryq kórdi.
«Bolashaqta mundaı baı jáne naqty derekter óziniń ádil baǵasyn taýyp, eki eldi baılanystyratyn irgeli faktorǵa aınalatyny sózsiz», - dedi QR SІM basshysy.
