Nursultan Nazarbaev jemqorlyqtyń qaıdan bastalatynyn aıtty

ASTANA. QazAqparat - "100 jańa oqýlyq" jobasy aıasynda menedjment pen kásipkerlikke arnalǵan birqatar qundy shyǵarmalar qazaq tiline aýdaryldy. Memleket basshysy Nursultan Nazarbaev keıbir kitaptardyń tıimdiligin erekshe atap ótti,  dep xabarlaıdy QazAqparat tilshisi.

"Rıkkı Grıfınniń "Menedjment" atty kitaby memlekettik sektor úshin de, jeke sektor úshin de asa mańyzdy. Máseleniń bári menedjmentte jatyr. Biz jekeshelendirýdi ne úshin bastadyq? Sebebi memleket jaqsy menedjer emes, basqara almaıdy. Al memlekettik qarajat bolǵannan keıin meniki de emes, onyki de emes. Sodan jemqorlyq ta, urlaý da shyǵady. Eger óndiris meniki bolsa, onda men ony paıdaly qylýǵa, tabys tabýǵa, ózimdi ósirýge tyrysamyn ǵoı. Sondyqtan menedjment - qazir óte kerek nárse", - dedi N.Nazarbaev búgin "100 jańa oqýlyqtyń" alǵashqy serııasyn tanystyrý rásiminde.

Memleket basshysynyń aıtýynsha, búginde jekeshelendirýdiń ekinshi kezeńi aıasynda memlekettiń qaramaǵyndaǵy óndirister jekemenshikke satylyp jatyr. Sonyń arqasynda atalǵan kásiporyndardyń tıimdiligi artady degen senim bar. Al memlekettiń mindeti basqa.

Budan bólek, Elbasy kásipkerlikti damytýǵa arnalǵan kitaptardyń tıimdiligin de erekshe atap ótti. "Donald Kýratkonyń «Kásipkerlik" atty kitabynda bıznesti tabysty damytý týraly júzdegen mysal bar. Bizde bıznespen shuǵyldanyp jatqan azamattarymyz osyny oqydy ma, joq pa? Áı, qaıdam, áıteýir biletinin jasap jatyr. "Kásipker - múmkindiktedi kóre biletin, qabyldaı alatyn, ony naryqtyq ıdeıaǵa aınaldyryp, sony iske asyra alatyn tulǵa" deıdi avtor. Osyndaı tulǵa bolǵysy keletin bizdiń jastarymyz úshin bul kitap qundy jolbasshy bola alady dep senemin, - dedi N.Nazarbaev. 

Aıta keteıik, búgin atalǵan kitaptardyń barlyǵy Prezıdentke tanystyryldy.  Sol kezde Memleket basshysy dinı bilimniń mańyzdylyǵyna da erekshe toqtaldy.