Nursultan Nazarbaev jastarǵa úlgi bolarlyq batyrlardy atady

ASTANA. QazAqparat - Qazaqstanda tabylǵan jádigerler Mysyr pıramıdalarynan da buryn jasalǵan. Bul týraly Elbasy - QR Qarýly Kúshteriniń Joǵarǵy Bas qolbasshysy Nursultan Nazarbaev aıtty, dep habarlaıdy QazAqparat tilshisi.

«Uly dalanyń jeti qyry» degen maqalamda bizdiń qaı zamannan beri kele jatqanymyzdy aıtyp óttim. Bizdiń qazaqtyń jastary shetelge barǵanda «sender kimsińder, qaıdan shyqtyńdar» degen suraqqa jaýap bere almaıdy. Bizdiń túp-tamyrymyz 3-5 myń jyl aryda jatqany myna muraıjaıda barlyǵynan kórinip tur. Bizdiń jerimizde tabylǵan jádigerler osydan 5-6 myń jyl buryn Mysyrdyń pıramıdasynan da erterek jasalǵany kórinip tur», - dedi QR Prezıdenti «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestiginiń jáne áskerı-patrıottyq klýbtardyń tárbıelenýshilerimen kezdesýinde. 

Memleket basshysynyń aıtýynsha, erte zamandarda-aq qazaq jerin mekendegen halyqtar  metallýrgııany ıgerip, ony joǵary deńgeıge kótergen. Al dúnıejúzinde qazaq jerinde eń birinshi bolyp atty úıretip, minýdi  qazirgi zymyrandy ıgerýmen teńeýge bolady.

Sonymen qatar, Elbasy búgingi jastardy úlgi bolarlyq batyrlarymyz búgingi kúni de kóp ekendigin basa aıtty.

«Senderdiń úlgi bolarlyq aǵalaryń kóp. Keshegi ekinshi dúnıejúzilik soǵysqa qatysqan batyr aǵamyz Baýyrjan Momyshuly  bar. Aryǵa barmaı-aq qoıaıyq, aralaryńyzda Armııa generaly Altynbaev, aýǵan soǵysyna qatystan general Ertaev, Aýǵanstandaǵy qan maıdannan shyqqan  Baqytbek Smaǵulov otyr», - dedi Memleket basshysy.