«Nurly Ertis» baǵdarlamasy ne beredi
Búgin Ekibastuzǵa atalmysh baǵdarlama boıynsha 35 otbasy qonys aýdarǵan bolatyn. Bul kóshti Pavlodar oblysynyń áleýmettik baǵdarlamalardy úılestirý basqarmasynyń basshysy Qaırat Nurmaǵambetov bastap barmaqshy.
«Búgin 35 januıany kóshirip áketemiz. Onyń 24-i kópbalaly. Jalpy jıyny 208 adamdy birneshe avtobýspen aparamyz. «Nurly Ertis» baǵdarlamasy boıynsha 1 mamyrdan búginge deıin Nur-Sultannan Ekibastuz qalasyna 102 otbasy kóship bardy. 600 adam qazir qonystaryna jaıǵasyp, eresekteriniń jartysynan astamy jumys taýyp úlgerdi. Baǵdarlamaǵa iligý úshin ol jaqta tapshy mamandyq boıynsha jumys isteýge kelisý kerek bolady. Basty shart osy. Al bala sany 4-ke jetpeıtin otbasylarǵa eki bólmeli páter beremiz. Kópbalaly otbasylarǵa 3 bólmeli usynyp otyrmyz», - deıdi ákimdik ókili.
«Nurly Ertiske» qatysýshylar «Turǵynúıqurylysjınaqbank» salǵan kirpish úılerge jaıǵastyrylyp jatyr.
«Basynda bul úıler basqa baǵdarlama boıynsha salynǵan bolatyn. Biraq ony banktiń sharty boıynsha alýǵa nıettiler tabylmady. Sondyqtan «Nurly Ertis» baǵdarlamasyna baǵyttaǵanbyz», - deıdi Qaırat Nurmaǵambetov.
Basqarma basshysy atalmysh otbasylarǵa Ekibastuzda qandaı jaǵdaı jasalatynyn da aıtty.
«Qonys aýdarýshylar úshin kóterme ótem retinde adam basyna 88500 teńge tólenedi. Bir jyl boıy kommýnaldyq tólemder men arenda aqysyn memleket tólep beredi. Bir jyl ótkennen keıin ǵana ózderi tóleı bastaıdy. Arenda quny páterdiń aýdanyna baılanysty. Eger páter 99 sharshy metr bolsa, aıyna 14 myń teńge shyǵady degen sóz. Eki bólmeli úıge 10 myń teńdeı bolady. Oǵan 15 myń teńge kommýnaldyq tólemderdi qosyńyz. Arenda úshin tólegen soma úıdi satyp alý somasyna túse beredi. ıAǵnı bes jyldan keıin ol úıdi jekemenshikke rásimdeý múmkindigi bar degen sóz», - deıdi Qaırat Nurmaǵambetov.
