Nurıslam Sanaevqa eki bólmeli páter berildi

AQTÓBE. QazAqparat - Tokıo Olımpıadasynyń qola júldegeri Nurıslam Sanaevqa óńir basshysy Ońdasyn Orazalın páter kiltin tabys etti, dep habarlaıdy QazAqparat tilshisi óńir basshysynyń baspasóz qyzmetine silteme jasap.

Oblys ákimi Ońdasyn Orazalın búgin Tokıoda ótken jazǵy Olımpıada oıyndarynan oralǵan aqtóbelik sportshylarmen jáne olardyń jattyqtyrýshylarymen kezdesti. Olımpıadanyń qola júldegeri Nurıslam Sanaevqa eki bólmeli páter kiltin syılady. Olımpıada oıyndaryna qatysqan balýan Meırambek Aınaǵulovqa, sýda júzýshi Dıana Nazarovaǵa, sonymen qatar, sportshylardyń jattyqtyrýshylaryna óńir basshysy baǵaly syılyqtar tabystady.

«Sizder - elimizdiń maqtanyshysyzdar. Jas urpaqqa salaýatty ómir salty men sportty dáripteýde úlgi bola otyra baǵa jetpes úles qosasyzdar. Adal ári aıanbaı kúreskenderińiz úshin, batyldyqtaryńyz ben otansúıgishtikterińizge shyn júrekten alǵys aıtamyn»,- dedi Ońdasyn Orazalın.

Olımpıadaǵa qatysýshylar oblys basshylyǵyna kásibı sportty qoldaǵany úshin alǵys aıtyp, josparlarymen bólisti.

«Qoldaǵany úshin halqyma sheksiz rızamyn. Jerlesterimniń qalaı qarsy alǵandaryn kórip, Olımpıada júldegeri bolǵanymdy anyq sezindim. Otandastarymdy Parıjde ótetin Olımpıadada altyn alqamen qýantý úshin budan da kóp daıyndalatyn bolamyn»,- dedi Nurıslam Sanaev.

Aıta keteıik, palýan ıÝsýp Batyrmyrzaev pen karateshi Nurqanat Ájiqanov, sonymen qatar Tokıodaǵy Olımpıada oıyndarynda Aqtóbe oblysy atynan shyqqan basqa da sportshylar týǵan jerge 11 tamyzda oralady. Sonymen birge sýda júzýshi Vıtalıı Hýdıakov Ystyqkól janynda ótip jatqan oqý-jattyǵý jıynyna kirisip te ketken.