Nur-Sultanda 349 saılaý ýchaskesi ashyldy

NUR-SULTAN. QazAqparat - Saılaýǵa qatysý – ár azamattyń konstıtýtsııalyq quqyǵy jáne eldiń bolashaǵy úshin jaýapty áreket. Ár daýys memlekettiń damýy úshin mańyzdy. 2021 jylǵy 10 qańtarda Qazaqstanda Parlament Májilisi men máslıhat depýtattarynyń kezekti saılaýy ótedi.

«Qazaqstan – demokratııalyq, zaıyrly, quqyqtyq memleket. Azamattardyń demokratııalyq quqyǵy saılaýda daýys berý barysynda kórinedi. Saılaý – bul eldiń damý jolyn halyq anyqtaıdy degen sóz. Eldegi saılaý ınstıtýtynyń damý deńgeıi qoǵam ómiriniń barlyq salalaryna áser etedi. Sondyqtan bolashaqta óz saılaýshylarynyń múddesin qorǵaıtyn kandıdattarǵa daýys berý múmkindigin paıdalaný óte mańyzdy. 2021 jyldyń 10 qańtarynda Qazaqstanda Májilis pen máslıhat depýtattarynyń saılaýy ótedi. Daýys berý úshin elordada 349 saılaý ýchaskesi ashyldy, 3322 komıssııa múshesi jumys isteıdi. Elorda turǵyndary barlyq máseleler boıynsha osy ýchaskelerge júgine alady», - dep atap ótti qalalyq saılaý komıssııasynyń tóraıymy Baqyt Bektemisova.

Nur-Sultanda barlyǵy 691 877 saılaýshy tirkelgen.

Parlament Májilisi men máslıhat depýtattaryn saılaýǵa: «Aýyl» halyqtyq-demokratııalyq partııasynan, «ADAL» saıası partııasynan, «Nur Otan» partııasynan, «Qazaqstan Halyq partııasynan», «Aq Jol» demokratııalyq partııasynan kandıdattar qatysatyn bolady.

Daýys berý saılaý ýchaskesiniń aýmaǵynda tirkelgen turǵylyqty jeri boıynsha jergilikti atqarýshy organdar, ıaǵnı aýdandyq ákimdikter bekitetin saılaýshylar tizimi boıynsha ótkiziledi. Sondyqtan daýys beretin ýchaskeńizdi aldyn ala bilý mańyzdy.

Nur-Sultanda muny JSN, tegin, atyn, ákesiniń atyn jáne týǵan kúnin ne saılaýshy tirkelgen obektiniń (kóshe, úı) mekenjaıyn kelesi servısterde kórsete otyryp, onlaın-rejımde jasaýǵa bolady:

1) Ákimdiktiń veb-portaly astana.gov.kz arqyly (bannerdiń basty betindegi «Óz saılaý ýchaskeńizdi tabyńyz»);

2) Smart Astana mobıldi qosymshasy («Qalalyq qyzmetter» bóliminde);

3) @smartastana_bot telegram-boty («Qyzmetter» bóliminde).

Osy baılanys arnalarynyń kómegimen saılaý ýchaskesiniń nómirin, ortalyqtyń mekenjaıyn jáne ataýyn, sondaı-aq kartadaǵy saılaý ýchaskesi ortalyǵynyń ornalasqan jeri týraly belgini tekserýge bolady.

Sondaı-aq, ınternetke shyǵý múmkindigi joq adamdar úshin 109 iKomek biryńǵaı baılanys ortalyǵy jumys isteıdi. Osy telefon nómirine qońyraý shalyp, azamattar óz saıttaryn taba alady.

Eske sala keteıik, elordada saılaý qarsańynda «Belsendi saılaýshy» aktsııasy bastaldy, onyń qorytyndysy 5 qańtarda shyǵarylady.

Aktsııanyń sharty boıynsha, óziniń saılaý ýchaskesin onlaın-servıster arqyly teksergen árbir bes myńynshy paıdalanýshy estelik syılyqqa ıe bolady.