Nıgerııada 45 qarýly qylmystyq top múshesiniń kózi joıyldy

ASTANA.KAZINFORM - Nıgerııa armııasy Katsına shtatynda júrgizilgen operatsııa kezinde qarýly bandalardyń 45 múshesin joıdy, dep habarlaıdy Anadolu.

Katsına shtatynyń bıligi 5 naýryzda kórshiles Zamfara shtatynan kelgen qarýly top músheleriniń maldy urlaýǵa árekettenýinen keıin aımaqta qaqtyǵys bolǵanyn habarlady.

Bıliktiń málimetinshe, shabýyldaýshylar 6 naýryzda aımaqta qaıta paıda bolyp, aldyńǵy operatsııalyq bazada ornalasqan bólimshelermen qaqtyǵys ornatqan.

Qaýipsizdik kúshteri men qarýly toptardyń arasyndaǵy qaqtyǵys kezinde 45 shabýyldaýshynyń kózi joıyldy. Atys kezinde bir kapıtan men eki sarbaz qaza tapqany týraly da habarlandy.

Nıgerııanyń soltústiginde, ásirese Katsına men Zamfara shtattarynda qarýly toptardyń aýyldarǵa únemi shabýyl jasap, adam men mal urlaýǵa ákep soqtyrǵany aıtylady.

Nıgerııa uzaq ýaqyt boıy qarýly toptardyń da, terrorıstik toptardyń da, sonyń ishinde «Boko Haram» men «ISWAP» shabýyldarynan zardap shekti, dep atap ótedi basylym.

Buǵan deıin Nıgerııanyń ortalyǵyndaǵy Plato shtatynda bolǵan qarýly shabýyldan 10 adam qaza tapqanyn jazǵan edik.