Nestle ónimderi Qytaıda sapa baqylaýynan ótedi

ASTANA. KAZINFORM — Qytaı nárestelerge arnalǵan qurǵaq sút qospasynyń sapasyn qatań baqylaýdy kúsheıtedi, dep habarlaıdy Sınhýa.

Qytaı Halyq Respýblıkasynyń Memlekettik Keńesiniń Azyq-túlik qaýipsizdigi komıteti men Naryqty retteý memlekettik basqarmasy nárestelerge arnalǵan qurǵaq sút qospasynyń sapasy men qaýipsizdigin baqylaýdy odan ári kúsheıtetinin málimdedi.

Jaqynda Nestle kompanııasy saqtyq sharasy retinde keıbir eýropalyq elderde belgili partııadaǵy qurǵaq sút qospasyn naryqtan qaıtarǵan bolatyn.

Osyǵan baılanysty atalǵan vedomstvolar Nestle China kompanııasynan óz korporatıvtik mindettemelerin oryndap, sáıkes partııadaǵy ónimdi Qytaı naryǵynan alyp tastaýyn jáne tutynýshylardyń zańdy múddesin durys qorǵaýyn talap etti.

Óz kezeginde Nestle China talaptardy oryndap, ónimdi qaıtarý sharalaryn júzege asyrǵan.

Budan buryn «Nestle Fýd Qazaqstan» JShS Qazaqstan aýmaǵynda saqtyq sharasy retinde balalar taǵamynyń shekteýli partııalaryn erikti túrde keri qaıtaryp jatqany habarlandy.

Sonymen qosa Qyrǵyzstanda, BAÁ, Kýveıt, Saýd Arabııasy jáne Qatarda Nestle balalar taǵamynyń jekelegen partııalary keri qaıtarylyp jatyr.