Nemis avtoóndirýshileri Tramp tarıfterinen keıin shyǵynǵa ushyrady

ASTANA.KAZINFORM  - Nemis avtomobıl kontsernderi AQSh-tyń jańa tarıfterine baılanysty 2025 jylǵy boljamdy túsim kólemin ataýǵa qorqyp otyr,  dep habarlaıdy DW.

AQSh prezıdenti Donald Tramptyń qosymsha baj salyǵyn engizýine baılanysty nemis avtomobıl óndirýshileri úlken shyǵynǵa ushyrady.

Bıylǵy birinshi toqsanda Mercedes-Benz jáne Volkswagen kontsernderiniń operatsııalyq paıdasy 40 paıyz tómendedi.

AQSh-tyń tarıf saıasatynyń aýytqýynan jáne naryqtyń boljanbaıtyn reaktsııasynan týyndaǵan eleýli belgisizdikke baılanysty Mercedes-Benz basshysy Ola Kellenıýs (Ola Källenius) kontsernniń jyldyq boljamyn jarııalaýdan bas tartty.

Óz kezeginde, VW Group kontserni ázirge AQSh-tyń jańa tarıfteriniń bıznesine áserin joqqa shyǵarady, biraq soǵan qaramastan VW Group-tyń jyldyq paıda boljamy 5,5-6,5 paıyz dıapazonynyń tómengi shegine deıin tómendedi, dep atap ótti Reuters.

AQSh-tyń avtomobılderge qosymsha salyǵy

Eýropadan kelgen avtomobılderge ımporttyq baj salyǵy 25 paıyz mólsherinde sáýir aıynan bastap qoldanylady, mamyr aıynan bastap quramdas bólikterdiń ımportyna qosymsha tarıfter kúshine enýi tıis.

29 sáýirde Tramp amerıkalyq avtomobıl óndirýshilerine jergilikti jetkizilimderdi ornatýǵa kóbirek ýaqyt berý úshin avtomobıl bólshekterine jańa baj salyǵyn azaıtý nıetin bildirdi.

Buǵan deıin AQSh elektronıka úshin baj salyǵyn ýaqytsha alyp tastap, jańa tarıf daıyndap jatqany habarlanǵan bolatyn.